सात प्रदेशका लागि सात ट्विनअटर जहाज खरिदको तयारी

नेपालका ५३ विमानस्थलमध्ये अधिकांश निष्क्रिय अवस्थामा रहँदा हिमाली र पहाडी जिल्लाका नागरिक अझै पनि नियमित हवाई सेवाबाट वञ्चित भइरहेका छन्। यसै पृष्ठभूमिमा संस्कृति, पर्यटन तथा नागरिक उड्डयनमन्त्री बद्री पाण्डेले सातै प्रदेशका लागि सातवटा ट्विनअटर जहाज खरिद गर्ने योजना अघि सारेका छन्।

मन्त्री पाण्डेका अनुसार, नेपाल एयरलाइन्ससँग रहेका दुई ट्विनअटर जहाजका आधारमा मात्र समस्या समाधान हुन नसकेकाले दीर्घकालीन सोचका साथ नयाँ विमान थप्नुपर्ने आवश्यकता छ। पारदर्शी मोडेलमार्फत जहाज खरिद गरी निजी क्षेत्रसँग सहकार्य गरेर सेवा विस्तार गर्ने सरकारको योजना रहेको उनले बताए।

कर्णालीमा हवाई संकट

कर्णाली प्रदेशका मुख्यमन्त्री यमलाल कँडेल नेतृत्वको टोली सिंहदरबार आएर संघीय सरकारलाई सुर्खेतलाई ‘ट्विनअटर हब’ बनाउन आग्रह गरेको छ। उनका अनुसार भर्खरै मात्र सडक सञ्जाल पुगेको कर्णालीका पहाडी जिल्लामा हवाई यातायात अझै पनि जीवनरेखा हो।

छलफलमा सहभागी पूर्वमुख्यमन्त्री जीवनबहादुर शाहीसहित सरोकारवाला निकायका प्रतिनिधिहरूले “हवाई सेवा बिना दुर्गम बस्तीहरू अझै पनि राज्यबाट अलग्गिएको जस्तो महसुस गर्छन्” भन्दै तत्काल कदम चाल्न सुझाव दिएका थिए।

निजी क्षेत्रको चुनौती

ट्विनअटर जहाज सञ्चालन गर्ने सीता एयरलाइन्सका प्रतिनिधिले यात्रु अभावकै कारण नियमित उडान कठिन भएको बताएका छन्। उनका अनुसार सुर्खेतबाट जुम्ला, सिमिकोटलगायत क्षेत्रमा उडान गर्न यात्रुको संख्यामा भर पर्नुपर्ने बाध्यता छ।
राज्यले सहुलियत उपलब्ध गराए मात्र नियमित उडान सम्भव हुने उनीहरूको माग छ।

नागरिक उड्डयन प्राधिकरणको विकल्प

नागरिक उड्डयन प्राधिकरणका महानिर्देशक प्रदीप अधिकारीले भने सुर्खेतलाई प्रादेशिक हबका रूपमा विकास गर्ने सम्भावना देखाएका छन्। उनका अनुसार नेपाल एयरलाइन्स र निजी क्षेत्रलाई सामेल गरेर दुर्गम जिल्लामा नियमित उडान सञ्चालन गर्न सकिनेछ।

समाधान कुन बाटो?

मन्त्री पाण्डेले जहाज अभावलाई मुख्य कारण बताउँदै तत्काल समाधानका लागि सातवटा ट्विनअटर खरिदको प्रस्ताव अघि सारेका छन्। तर प्राधिकरणले देखाएको ‘सुर्खेत हब मोडेल’ र निजी क्षेत्रले राखेको ‘राज्य सहुलियत’ दुवै विकल्प व्यवहारिक कार्ययोजनासँग जोडिए मात्र दुर्गमका नागरिकले राहत पाउने स्पष्ट भएको छ।