राष्ट्रपति रामचन्द्र पौडेलले नेपाललगायत जलवायु परिवर्तनबाट प्रभावित मुलुकहरूको जलवायु न्याय सुनिश्चित गर्न अन्तर्राष्ट्रिय समुदायसँग अपिल गरेका छन् ।
सोमबार राष्ट्रका नाममा सम्बोधन गर्दै राष्ट्रपति पौडेलले विश्वव्यापी तापक्रम वृद्धिका कारण नेपालजस्ता मुलुकमा गम्भीर जोखिम बढिरहेको बताएका हुन् । पछिल्लो विपत्तिले नेपालको हिमाली पर्यावरण अत्यन्तै संवेदनशील अवस्थामा रहेको देखाएको उनको भनाइ छ ।
राष्ट्रपति पौडेलले जलवायु परिवर्तनका कारण जोखिममा परेका राष्ट्रहरूको आवाज सुन्न मात्रै नभई उनीहरूका लागि ठोस र प्रभावकारी कदम चाल्न अन्तर्राष्ट्रिय समुदायलाई आग्रह गरेका छन् ।
उनले भने, “यस विपत्तिले न केवल हाम्रो हिमाली पर्यावरणको असाधारण नाजुक अवस्था दर्शाउँछ, अपितु यसले निरन्तर बढ्दै गएको विश्वव्यापी तापक्रम र त्यसबाट उत्पन्न जोखिमप्रति हामीलाई पुनः गम्भीर रूपमा सचेत गराएको छ ।”
राष्ट्रपति पौडेलले नेपालले विगतमा भूकम्प, बाढी, पहिरो, महामारीलगायत विभिन्न प्राकृतिक तथा मानवीय विपत्तिको सामना गर्दै आएको स्मरण गरे । हरेक विपत्तिमा नेपाली जनताले साहस, धैर्य, संयम र दृढताका साथ परिस्थितिको सामना गर्दै आएको उनले बताए ।
उनले पछिल्लो विपत्तिबाट प्रभावित नागरिकप्रति सहानुभूति व्यक्त गर्दै विपद् व्यवस्थापन तथा पुनःस्थापनाका लागि सबै पक्ष एकजुट हुनुपर्नेमा जोड दिएका छन् ।
प्रतिक्रिया