खोटाङ जिल्लाको केपिलासगढी गाउँपालिका–२ खार्ताम्छास्थित बालाबेसी क्षेत्रमा हेलिकोप्टर दुर्घटना भएको छ। काठमाडौंबाट ६ जना यात्रु बोकेर गएको उक्त हेलिकोप्टर अवतरण गर्ने क्रममा दुर्घटनामा परेको हो।
प्रारम्भिक जानकारीअनुसार हेलिकोप्टर बारीको डिलमा अवतरण गर्ने प्रयासमा थियो। तर, डिलमा सुरक्षित रूपमा अवतरण गर्न नसकेपछि पुनः उडाएर बारीको बीच भागमा सार्ने प्रयास गर्दा नियन्त्रण गुमेर दुर्घटना भएको केपिलासगढी गाउँपालिका अध्यक्ष समिर राईले जानकारी दिएका छन्।
यसअघि प्रमुख जिल्ला अधिकारी रेखा कँडेलले हेलिकोप्टर शव बोकेर गएको जानकारी दिएकी थिइन्। तर, खार्ताम्छा वडाध्यक्ष मिलन कुमार राईले हेलिकोप्टरमा कुनै शव नरहेको स्पष्ट पारेका छन्। यसले प्रारम्भिक सूचनामा केही भ्रम सिर्जना भएको देखिएको छ।
दुर्घटनामा कुनै मानवीय क्षति नभएको प्रमुख जिल्ला अधिकारी कँडेलले पुष्टि गरेकी छन्। हेलिकोप्टरमा सवार सबै यात्रु सुरक्षित रहेका छन् भने घटनास्थलमा सामान्य क्षति मात्र भएको बताइएको छ।
घटनापछि स्थानीय बासिन्दा तथा सुरक्षाकर्मीहरू घटनास्थलमा पुगेका छन्। दुर्घटनाको विस्तृत कारणबारे थप अनुसन्धान भइरहेको जिल्ला प्रशासन कार्यालयले जनाएको छ।
स्थानीयस्तरमा भने हेलिकोप्टर अवतरणका लागि उपयुक्त स्थानको अभाव तथा भौगोलिक कठिनाइका कारण यस्तो दुर्घटना हुने जोखिम उच्च रहेको बताइएको छ।
प्रतिक्रिया