चक्रवात ‘अर्नब’को सम्भावित प्रभावलाई ध्यानमा राख्दै नेपाल नागरिक उड्डयन प्राधिकरण (क्यान)ले देशभरका विमानस्थल तथा वायुसेवा कम्पनीलाई उडान सुरक्षामा उच्च सतर्कता अपनाउन निर्देशन दिएको छ ।
प्राधिकरणले बुधबार निर्देशन जारी गर्दै आज र भोलि (अक्टोबर २९ र ३०) चक्रवातको प्रभावका कारण हवाई सेवा प्रभावित हुन सक्ने भन्दै सम्बन्धित निकायलाई आवश्यक सुरक्षा सतर्कता अपनाउन निर्देशन दिएको हो।
प्रतिकूल मौसमका कारण भारी वर्षा, तीव्र हावाहुरी, चट्याङ र कम दृश्यताले विमानको उडान तथा अवतरणमा असर पार्न सक्ने प्राधिकरणले जनाएको छ । हिमाली तथा उच्च पहाडी क्षेत्रमा हिमपात हुँदा उडान सञ्चालन थप चुनौतीपूर्ण हुन सक्ने जनाइएको छ ।
प्राधिकरणले हवाई यातायात व्यवस्थापन इकाइलाई मौसम प्रतिकूल भएमा उडान मार्ग परिवर्तन गर्ने, विमानलाई आकाशमै प्रतीक्षा गराउने तथा वैकल्पिक विमानस्थलमा अवतरण गराउनेलगायत आकस्मिक योजना तयार राख्न निर्देशन दिएको छ ।
त्यस्तै, हावाको गतिमा अचानक परिवर्तन, तीव्र वायुको हलचल र चट्याङसम्बन्धी जानकारी उडानमा रहेका तथा उडान भर्न लागेका विमानलाई तत्काल उपलब्ध गराउन भनिएको छ ।
प्रतिकूल मौसमका समयमा विमानस्थलका वैकल्पिक विद्युत् प्रणाली, सञ्चार उपकरण तथा हवाई मार्ग निर्देशन प्रणाली पूर्ण रूपमा सञ्चालनयोग्य राख्न पनि प्राधिकरणले निर्देशन दिएको छ ।
चक्रवातको प्रभावले विभिन्न प्रदेशमा वर्षा र तीव्र हावाहुरीको सम्भावना रहेकाले हवाई तथा स्थल यातायात प्रभावित हुन सक्ने अनुमान गरिएको छ ।
प्रतिक्रिया