विपिनले एक्सन मुभिमा अभिनय गर्दै

अभिनेता विपिन कार्कीको एक्सन मुभि आउने भएको छ । सौरभ चौधरीको निर्देशनमा बन्ने चलचित्र ‘कर्मा’ मा अभिनेता कार्की मुख्य भुमिकामा देखिने भएका छन् ।

यसअघि ‘अगस्त्य’ बाट चर्चामा आएका निर्देशक चौधरीको नयाँ एक्सन फिल्म ‘कर्मा’ को शुक्रबार सार्वजनिक भएको पोस्टरमार्फत् विपिनको भुमिकालाई देखाउन खोजिएको छ । पोस्टरमा उनलाई जिममा बारबेल उचाल्दै गरेको देख्न सकिन्छ ।

‘कर्मा’मा विपिन गत भदौमा नै अनुबन्ध भएका हुन् । उनले दुई सातादेखि शरीर सुगठित बनाउन जिममा मिहिनेत गरिरहेका छन् । उनलाई पहिलो पटक एक्सन भूमिकामा हेर्न दर्शकलाई रोचक हुने आशा गरिएको छ ।

आगामी मंसिर दोस्रो सातापछि छायांकनमा जान लागेको फिल्मको प्रदर्शन मिति पनि घोषणा गरिएको छ । नयाँ वर्षको छेको पारेर आगामी चैत २९ गतेबाट फिल्म प्रदर्शनमा आउने छ ।

फिल्ममा निर्देशक चौधरी स्वयंको लेखन छ । आर्टिस्टिक इन्टरटेनमेन्टको प्रस्तुति रहेको ‘कर्मा’मा वसन्त लम्साल निर्मातामा छन् । तत्काल विपिनबाहेक फिल्ममा अरु कलाकार निश्चित भएका छैनन् । यसमा कलाकारको ‘लाइनअप’ बलियो हुने जनाइएको छ ।