काठमाडौँ । रसुवामा आएको भोटेकोशी बाढीमा परी मृत्यु हुनेको सङ्ख्या १ हजार २९४ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले शुक्रबार साँझ पत्रकार सम्मेलन गरी बाढीमा मृत्यु भएका १ हजार २९४ जनाको शव फेला परेको जनाएको हो।
प्राधिकरणका प्रवक्ता शान्ति महतका अनुसार बाढीपछि ५ हजार ५३ जना अझै बेपत्ता छन्। हालसम्म १३ हजार ९५ जनाको उद्धार गरिएको छ।
रसुवा, नुवाकोट र धादिङका ३७ वटा होल्डिङ सेन्टरमा ४ हजार ६२७ जना आश्रय लिएर बसेका छन्। प्रारम्भिक विवरणअनुसार बाढीबाट ७ हजार ५७० घर पूर्ण रूपमा क्षतिग्रस्त भएका छन् भने ३२ हजार ९३३ जना प्रत्यक्ष प्रभावित भएका छन्।
बाढीबाट ४८ सरकारी संरचना, १८ विद्यालय र ७ स्वास्थ्य संस्थामा क्षति पुगेको प्राधिकरणले जनाएको छ। त्यस्तै, ५५ किलोमिटर सडक पूर्ण रूपमा क्षतिग्रस्त भएको छ भने ३७ वटा मोटरेबल पुल र ६८ वटा झोलुङ्गे पुलमा क्षति पुगेको छ।
बाढीका कारण १ हजार ८०६ हेक्टर कृषियोग्य जमिन नष्ट भएको छ। यसबाट ७ हजार ६८६ मेट्रिक टन खाद्यान्न उत्पादनमा कमी आउने प्रारम्भिक आकलन गरिएको प्राधिकरणले जनाएको छ।
त्यस्तै, बाढीबाट ३ वटा जलविद्युत् आयोजना, १ वटा सोलार प्लान्ट र २ वटा प्रसारण लाइनमा क्षति पुगेका छन्। यसका कारण ७८३ मेगावाट विद्युत् उत्पादन प्रभावित भएको प्राधिकरणको प्रारम्भिक विवरणमा उल्लेख छ।
प्रतिक्रिया