त्रिशूली नदीको बाढीका कारण अवरुद्ध बनेको पृथ्वी राजमार्गअन्तर्गत धादिङको गजुरी गाउँपालिका–३ स्थित परेवाभिरमा वैकल्पिक ट्रयाक खोलिएको छ।
बाढीको कटानका कारण सडक भासिएर पूर्णरूपमा अवरुद्ध भएको उक्त स्थानमा करिब १०० मिटर लामो नयाँ ट्रयाक खोलिएको जिल्ला प्रहरी कार्यालय धादिङले जनाएको छ।
वैकल्पिक ट्रयाक खुलेसँगै उक्त सडकखण्डमा सवारी साधन सामान्य रूपमा सञ्चालन हुन थालेका छन्। यद्यपि, नयाँ ट्रयाकसमेत जोखिमपूर्ण रहेकाले सावधानीपूर्वक यात्रा गर्न प्रहरीले आग्रह गरेको छ।
यसअघि त्रिशूलीको बाढीका कारण पृथ्वी राजमार्गकै कृष्णभिरमा सडक भासिएपछि आवागमन पूर्णरूपमा अवरुद्ध भएको थियो। सडक क्षतिपछि काठमाडौं आवतजावतका लागि नारायणगढबाट हेटौंडा हुँदै काठमाडौं जोडिने तीन वैकल्पिक रुट प्रयोग भइरहेका थिए।
यसैबीच, काठमाडौंबाट मुग्लिनतर्फ जाने सवारीमध्ये पेट्रोलियम पदार्थ बोकेका सवारी र दुईपाङ्ग्रे बाहेकका सबै सवारीलाई नागढुंगा सुरुङमार्ग सञ्चालनमा ल्याइएको छ।
नागढुंगा–पातले वन क्षेत्रमा सडक भासिएपछि प्रभावित भएको आवागमनलाई व्यवस्थापन गर्दै पेट्रोलियम पदार्थ बोकेका सवारी र मोटरसाइकललाई भने सडक भासिएको स्थानबाट एकतर्फी रूपमा सञ्चालनको व्यवस्था मिलाइएको सडक विभागले जनाएको छ।
विभागका अनुसार सडक भासिएको स्थानमा प्राविधिक अध्ययनपछि मात्र मर्मतको काम सुरु हुनेछ। अध्ययनपछि सडकलाई पूर्णरूपमा सञ्चालनमा ल्याउने विषयमा आवश्यक निर्णय गरिने विभागले जनाएको छ।
बाढी र सडक भासिने समस्याका कारण प्रभावित पृथ्वी राजमार्गमा क्रमशः आवागमन सहज बनाउने प्रयास भइरहेको छ।
प्रतिक्रिया