सुदूरपश्चिम प्रदेशका मुख्यमन्त्री खगराज भट्टले भोलि प्रदेश सभाबाट विश्वासको मत लिने तयारी गरेका छन्। सोमबार मुख्यमन्त्री निवासमा भएको छलफलपछि भोलि नै विश्वासको मत लिने गरी तयारी अघि बढाइएको हो।
विश्वासको मत लिने विषयमा छलफल गर्न आज दिउँसो २ बजे नेकपा संसदीय दलको बैठक बोलाउने तयारी गरिएको छ। मुख्यमन्त्रीसँग छलफलमा रहेका एक प्रदेश सभा सदस्यका अनुसार संसदीय दलको बैठकबाट आवश्यक निर्णय गरी भोलि विश्वासको मत लिने तयारी गरिएको हो।
शुक्रबार मुख्यमन्त्रीमा नियुक्त भएका भट्टले विश्वासको मत लिएलगत्तै प्रदेश सरकारलाई पूर्णता दिने तयारीसमेत गरेका छन्। हाल नेकपा एमालेका तर्फबाट तीन मन्त्री र एक राज्यमन्त्री नियुक्त भइसकेका छन्।
अब नेकपाको तर्फबाट थप तीन मन्त्री र दुई राज्यमन्त्री नियुक्त गर्ने तयारी रहेको बताइएको छ। सरकार विस्तार र विश्वासको मतका विषयमा नेकपा संसदीय दलका नेता एवं मुख्यमन्त्री भट्ट र नेकपा सुदूरपश्चिम प्रदेश इन्चार्ज भानुभक्त जोशीबीच संयुक्त छलफल भएको थियो।
त्यसअघि प्रदेश संयोजक हरि चौधरी, नेतृ रञ्जिता श्रेष्ठ, इन्चार्ज जोशी र मुख्यमन्त्री भट्टबीच पनि विश्वासको मत तथा सरकार गठनका विषयमा छलफल भएको थियो।
मुख्यमन्त्रीमा नियुक्त भएको केही दिनमै भट्टले विश्वासको मत लिने तयारी गरेसँगै सुदूरपश्चिम प्रदेश सरकारको आगामी राजनीतिक समीकरणसमेत स्पष्ट हुने भएको छ। विश्वासको मत प्राप्त गरेपछि सरकारलाई पूर्णता दिने र मन्त्रालयको जिम्मेवारी बाँडफाँट गर्ने प्रक्रिया अघि बढाउने तयारी छ।
प्रतिक्रिया