वैकल्पिक राजनीतिका नाममा अघि बढिरहेका दुई शक्ति—राष्ट्रिय स्वतन्त्र पार्टी (रास्वपा) र कुलमान घिसिङ संरक्षित उज्यालो नेपाल पार्टी—बीचको एकता प्रयास नेतृत्व र पद बाँडफाँटमै अड्किएर असफल भएको छ।
दुवै पक्षबीच विचार र एजेन्डाभन्दा बढी पार्टी संरचना, पद र पहिचानका विषयमा मतभेद चर्किँदा बहुप्रतीक्षित एकता सहमति टुटेको हो। संवादमा सहभागी नेताहरूका अनुसार उज्यालो नेपाल पक्षले वरिष्ठ उपसभापति, महामन्त्रीजस्ता निर्णायक पद र पार्टीको नाम परिवर्तनसमेतको प्रस्ताव अघि सारेपछि रास्वपा असहमत बनेको थियो।
रास्वपाका एक नेताका अनुसार प्रारम्भिक समझदारीभन्दा पछि हट्दै आएका प्रस्तावहरूले आपसी विश्वास कमजोर बनाएको थियो।
‘एकता विचारमा होइन, पदमा सीमित हुन थालेपछि सहमति सम्भव भएन,’ ती नेताले बताए।
यस एकता प्रयासमा काठमाडौं महानगरपालिकाका प्रमुख बालेन्द्र शाह (बालेन)समेत सहभागी छलफलहरू भए पनि अन्तिम निर्णयमा पुग्न सकिएन। ऊर्जामन्त्री पदबाट राजीनामा दिएका कुलमान घिसिङले पछिल्लो समय आफू कुनै दलमा आबद्ध नभएको भन्दै स्वतन्त्र राजनीतिक पहिचान खोजिरहेका थिए।
राजनीतिक विश्लेषकहरूका अनुसार यो घटनाले नयाँ भनिएका दलहरू पनि पुरानै नेतृत्व केन्द्रीत सौदाबाजीबाट मुक्त हुन नसकेको संकेत दिएको छ। वैकल्पिक राजनीतिको अपेक्षा गरिरहेका मतदाताका लागि यो एकता भंगले निराशा थपेको उनीहरूको निष्कर्ष छ।
अब रास्वपा आफ्नै संगठन विस्तारमा अघि बढ्ने र उज्यालो नेपालले स्वतन्त्र यात्रालाई निरन्तरता दिने संकेत देखिएको छ। तर यो असफलताले आगामी चुनावी समीकरण र नयाँ शक्ति निर्माणको सम्भावनामा गम्भीर प्रश्न उठाएको छ।
प्रतिक्रिया