स्विट्जरल्यान्डमा सामाजिक सञ्जाल बन्द हुन सक्ने संकेत

स्विट्जरल्यान्डकी गृहमन्त्री एलिजाबेथ बाउमे–श्नाइडरले बालबालिकालाई सामाजिक सञ्जालका जोखिमबाट जोगाउन देशले थप कडा कदम चाल्नुपर्ने बताएकी छन्। उनले आवश्यक परेमा नाबालकका लागि सामाजिक सञ्जाल प्रतिबन्धसमेत लगाउन आफू खुला रहेको संकेत गरेकी छन्।

अष्ट्रेलियाले १६ वर्षमुनिका बालबालिकाका लागि सामाजिक सञ्जाल प्रतिबन्ध लगाएको सन्दर्भ उल्लेख गर्दै बाउमे–श्नाइडरले भनेकी छन्, “अष्ट्रेलिया र युरोपेली संघमा भइरहेको बहस महत्वपूर्ण छ। यो बहस स्विट्जरल्यान्डमा पनि हुनैपर्छ। म सामाजिक सञ्जाल प्रतिबन्धका पक्षमा खुला छु। हामीले आफ्ना बालबालिकालाई अझ राम्रोसँग जोगाउनुपर्छ।”

केन्द्र–बायाँ धारको सोसल डेमोक्र्याट पार्टीकी सदस्य बाउमे–श्नाइडरका अनुसार, के–कस्ता विषयमा प्रतिबन्ध आवश्यक छ भन्नेबारे गम्भीर छलफल गर्नुपर्ने बेला आएको छ। उनले बालबालिकालाई सामाजिक सञ्जाल प्रयोग गर्न नदिनेदेखि हानिकारक सामग्री नियन्त्रण गर्ने, साथै युवाहरूको कमजोरी लक्षित गर्ने एल्गोरिदममाथि नियन्त्रण गर्नेसम्मका विकल्पहरू औंल्याइन्।

उनका अनुसार यस विषयमा विस्तृत छलफल नयाँ वर्षदेखि सुरु हुनेछ, जसलाई एक प्रतिवेदनले आधार प्रदान गर्नेछ। “हामीले सामाजिक सञ्जाल प्लेटफर्महरूलाई पनि बिर्सनु हुँदैन,” उनले भनिन्, “बालबालिका र युवाहरूले के सामग्री उपभोग गर्छन् भन्नेमा ती प्लेटफर्महरूले जिम्मेवारी लिनुपर्छ।”

अष्ट्रेलियाले लगाएको प्रतिबन्धलाई धेरै अभिभावक र बालकल्याणका पक्षमा काम गर्ने समूहहरूले स्वागत गरेका छन्। तर, प्रमुख प्रविधि कम्पनीहरू र अभिव्यक्ति स्वतन्त्रताको पक्षधरहरूले भने यसको आलोचना गरेका छन्।

यसैबीच, यसै महिनाको सुरुआतमा स्विट्जरल्यान्डको फ्रिबोर्ग क्यान्टनको संसद्ले करिब १५ वर्ष उमेर नपुगेका बालबालिकालाई विद्यालयमा मोबाइल फोन प्रयोग गर्न नदिने निर्णय गरेको छ। विद्यालयहरूमा मोबाइल फोन प्रयोग सीमित गर्ने उद्देश्यसहित स्थानीय तहमा लिइएको यो पछिल्लो कदम हो।