भेनेजुएलाले अमेरिकी राष्ट्रपति डोनाल्ड ट्रम्पले आफ्नो वरपरको हवाई क्षेत्र बन्द गर्नुपर्ने अभिव्यक्ति दिएपछि देशमाथि ‘औपनिवेशिक खतरा’ गरेको आरोप लगाएको छ ।
देशको विदेश मन्त्रालयले ट्रम्पको टिप्पणीलाई भेनेजुएलाका जनताविरुद्धको अर्को असाधारण, गैरकानुनी र अनुचित आक्रमण भएको दाबी गरेको छ ।
अन्य कुनै देशको हवाई क्षेत्र बन्द गर्न अमेरिकासँग कानुनी अधिकार नहुँदासमेत, ट्रम्पको अनलाइन पोस्टले यात्रुहरूमा अनिश्चितता सिर्जना गर्न सक्ने र एयरलाइन्सहरूलाई त्यहाँ सञ्चालन गर्नबाट रोक्न सक्ने बताइएको थियो ।
अमेरिकाले क्यारिबियन क्षेत्रमा आफ्नो सैन्य उपस्थिति बढाइरहेको छ, जसलाई अधिकारीहरूले लागुपदार्थ तस्करीविरुद्धको लडाइँका रूपमा प्रस्तुत गरेका छन् ।
भेनेजुएलाका राष्ट्रपति निकोलस मादुरोले लागुपदार्थ तस्करीसम्बन्धी अमेरिकी दाबीहरूलाई आफूलाई हटाउने उद्देश्यले गरिएको प्रयास भन्दै खारेज गरेका छन् ।
सामाजिक सञ्जाल ‘ट्रुथ सोसियल’मा पोस्ट गर्दै ट्रम्पले लेख्दै भनेका छन्, “सबै एयरलाइन्स, पाइलटहरू, लागुपदार्थ तस्करहरू र मानव तस्करहरूले कृपया भेनेजुएलाको माथि र वरपरको सम्पूर्ण हवाई क्षेत्रलाई बन्द भएको मान्नुहोला ।”
यसबारे टिप्पणी गर्न बीबीसीले गरेको अनुरोधमा ह्वाइट हाउसले तत्काल कुनै प्रतिक्रिया दिएको छैन ।
ट्रम्पको यो टिप्पणी अमेरिकी संघीय उड्डयन प्रशासनले एयरलाइन्सहरूलाई भेनेजुएला र यसको वरपर बढ्दो सैन्य गतिविधिबारे चेतावनी दिएको केही दिनपछि आएको हो ।
शनिबार जारी एक विज्ञप्तिमा भेनेजुएलाको विदेश मन्त्रालयले अमेरिकाले आफ्ना साप्ताहिक आप्रवासी स्वदेश–फिर्ती उडानहरू एकतर्फी रूपमा निलम्बन गरेको आरोप लगाएको छ ।
उक्त विज्ञप्तिमा भनिएको छ, “हामी अन्तर्राष्ट्रिय समुदाय, विश्वका सार्वभौम सरकारहरू, संयुक्त राष्ट्रसंघ र सम्बन्धित बहुपक्षीय संस्थाहरूलाई यो अनैतिक आक्रामक कार्यलाई दृढतापूर्वक अस्वीकार गर्न आह्वान गर्दछौँ ।”
भेनेजुएलाले बुधबार आइबेरिया, टीएपी पोर्चुगल, गोल, लाटाम, एभिएन्का र टर्किस एयरलाइन्ससहित ६ प्रमुख अन्तर्राष्ट्रिय एयरलाइन्सलाई उडान पुनः सुरु गर्नका लागि दिइएको ४८ घण्टे समयसीमा पूरा गर्न असफल भएपछि त्यहाँ अवतरणमा प्रतिबन्ध लगाएको थियो ।
अमेरिकाले विश्वकै सबैभन्दा ठूलो विमानवाहक युद्धपोत यूएसएस जेराल्ड फोर्ड र करिब १५ हजार सैनिकलाई भेनेजुएलामाथि आक्रमण गर्न सक्ने दूरीमा तैनाथ गरेको छ ।
सन् १९८९ मा पानामामाथि आक्रमण गरेपछि यो तैनाथी क्यारिबियन क्षेत्रमा अमेरिकाको सबैभन्दा ठूलो सैन्य परिचालन भएको बताउँदै, अमेरिकाले यसलाई लागूपदार्थ तस्करीविरुद्धको अभियानका रूपमा व्याख्या गरेको छ ।
बिहीबार ट्रम्पले भेनेजुएलाको लागूपदार्थ तस्करी रोक्नका लागि अमेरिकी प्रयासहरू जमिनबाट चाँडै नै सुरु हुने चेतावनी दिएका थिए ।
अमेरिकी सेनाले लागूपदार्थ बोकेको दाबी गरिएका डुङ्गाहरूमा कम्तीमा २१ वटा आक्रमण गरेको छ, जसमा ८० भन्दा बढी मानिस मारिएका छन् । यद्यपि, अमेरिकाले ती डुङ्गाहरूमा लागूपदार्थ रहेको कुनै प्रमाण सार्वजनिक गरेको छैन ।
प्रतिक्रिया