प्रधानमन्त्री ओली सहितकाे उच्च स्तरिय टाेली चिन प्रस्थान

प्रधानमन्त्री केपी शर्मा ओली पाँच दिने चीन भ्रमणमा आज बिहान प्रस्थान गरेका छन्। चिनियाँ राष्ट्रपति सी चिनफिङको विशेष निमन्त्रणमा भएको यो भ्रमणलाई नेपाल–चीन सम्बन्ध र क्षेत्रीय कूटनीतिक सन्तुलनको दृष्टिले महत्त्वपूर्ण मानिएको छ।

ओली प्रधानमन्त्री बनेपछिको दोस्रो चीन भ्रमण हो। उनी आगामी भदौ १८ गतेसम्म चीनमा रहनेछन्। यस अवधिमा उनले उत्तरी चीनको तियान्जिनमा हुने सांघाई सहयोग संगठन (एससीओ) शिखर सम्मेलन मा भाग लिनेछन्। उक्त सम्मेलनमा भारतीय प्रधानमन्त्री नरेन्द्र मोदीसहित विभिन्न राष्ट्रका प्रमुखहरूको उपस्थिति रहनेछ।

कूटनीतिक सन्देश

विशेषज्ञहरूले ओलीको यो भ्रमणलाई केवल औपचारिकता नभई, नेपालले भारत–चीनबीचको कूटनीतिक सन्तुलनमा पुनः बलियो उपस्थिती देखाउने अवसरका रूपमा हेरिरहेका छन्। प्रधानमन्त्रीले सम्मेलनका क्रममा चिनियाँ राष्ट्रपति सी चिनफिङसँग छुट्टै भेटवार्ता गर्ने कार्यक्रम छ। त्यस्तै, चीनका उपराष्ट्रपति हान झेङसहित विभिन्न राष्ट्रका नेताहरूसँग पनि द्विपक्षीय भेटवार्ता गर्नेछन्।

भ्रमण टोलीमा कांग्रेस नेतासहित

सरकारी प्रतिनिधिमण्डलमा प्रधानमन्त्रीकी श्रीमती राधिका शाक्य, शिक्षामन्त्री रघुजी पन्त, पर्यटनमन्त्री बद्रीप्रसाद पाण्डे, प्रधानमन्त्रीका आर्थिक सल्लाहकार डा. युवराज खतिवडा, सांसद् छविलाल विश्वकर्मा मात्र नभई नेपाली कांग्रेसका उपसभापति पूर्णबहादुर खड्का समेत सहभागी हुनु राजनीतिक दृष्टिले रोचक मानिएको छ। यसले नेपालको विदेश नीतिमा दलगत सहमतिको संकेत गर्ने विश्लेषण गरिएको छ।

ऐतिहासिक कार्यक्रममा समेत सहभागी

प्रधानमन्त्री ओलीले भ्रमणको क्रममा चीनमा आयोजना हुने जापानी आक्रमणविरुद्धको प्रतिरोध युद्ध र विश्वव्यापी फासिवादविरोधी युद्ध विजयको ८०औँ वार्षिकोत्सव कार्यक्रममा समेत सहभागिता जनाउने कार्यक्रम रहेको छ। यसलाई नेपालले क्षेत्रीय शान्ति र साझा ऐतिहासिक स्मृतिमा सहानुभूति व्यक्त गर्ने अवसरका रूपमा लिइएको छ।

आगामी दिनका लागि सन्देश

ओलीको भ्रमणमार्फत नेपालले चीनसँग आर्थिक सहयोग, पूर्वाधार विकास र बहुपक्षीय कूटनीतिक मंचमा सक्रियता बढाउने अपेक्षा गरिएको छ। एससीओ सम्मेलनमा नेपालले औपचारिक सदस्यता नभए पनि पर्यवेक्षकको भूमिकामा उपस्थित हुने चर्चा भइरहेको छ।

विश्लेषकहरूको भनाइमा, भारत र चीनबीच तनावपूर्ण सम्बन्ध रहँदा नेपालले दुवै मुलुकसँग सन्तुलन कायम गर्दै अन्तर्राष्ट्रिय कूटनीतिक खेलमा आफ्नो भूमिका बढाउने अवसर यस भ्रमणले प्रदान गर्न सक्छ।