फाप्लु बिमानस्थलमा रिफ्युलिङ सेन्टर स्थापनाको काम अघि बढ्यो: मन्त्री राई

रक्षा मन्त्री मानवीर राईले रीफ्यूलिङ सेन्टर स्थापनाको लागि अन्य बाँकी प्रक्रियाहरू अघि बढेको बताए ।

सोलुखुम्बुको फाप्लु विमानस्थलमा स्थापना गर्ने भनिएको रीफ्यूलिङ सेन्टरको बाँकी प्रक्रियाको लागि ताकेता गरिरहेको उनले बताएका हुन् । मन्त्री राईले उद्योग, वाणिज्य तथा आपूर्ति मन्त्रालय र पर्यटन मन्त्रालय दुवै मन्त्रालयमा निवेदन पुराइसकेको समेत जानकारी दिए। दुवै मन्त्रालयका मन्त्री र अन्य सम्बन्धित निकाय पनि सकारात्मक रहेको बताउँदै उनले अब चाँडै फाप्लु विमानस्थलमा रीफ्यूलिङ सेन्टर स्थापना गर्ने सहमति भएको बताए ।

मन्त्री राईले स्प्रिङ सिजनदेखि नै अस्थायी रूपमा रिफ्युलर ट्याङ्कर राखेर रीफ्यूलिङ सेन्टर सुरु गर्ने र आगामी सिजनको लागि स्थायी रूपमा सञ्चालन गर्नका लागि काम अगाडी बढाउने सहमति भएको जनाए। रीफ्यूलिङ सेन्टर स्थापना पश्चात रामेछापको मन्थली विमानस्थलबाट पर्यटकिय मौसममा हुने आन्तरिक हवाई उडानमा मौसमको कारणले भइरहेको समस्या समाधान हुने, हवाई उद्धार तथा राहत कार्य, उडान क्षेत्रको समस्या हल हुने मन्त्री राईको भनाइ छ । 

समग्र  पर्यटन क्षेत्रको विकास, सोलुखुम्बु बासीको समस्या र मागको विषय रीफ्यूलिङ सेन्टर स्थापना कार्यको प्रक्रियाको लागि करिब ६ महिनादेखि ताकेता भै रहेको छ। समग्र पर्यटन क्षेत्रको विकासका लागि आफू चिन्तित रहेको बताउँदै उनले सोलुखुम्बु बासीको माग सम्बोधन हुने कुरामा विश्वस्त रहन आग्रह गरे ।

यसैबिच नेपाल आयल निगमले रीफ्यूलिङ सेन्टर स्थापना कार्यको लागि अध्ययन गरिरहेको जनाएको छ । प्रारम्भिक रूपमा छलफल भएको र निष्कर्षको लागि बाँकी छलफल भइरहेको नेपाल आयल निगमका इन्जिनियर जगदिसचन्द्र यादवले जानकारी दिए ।