स्थानियको श्रमदानले सल्लेरीमा खुल्यो बाटो

सोलुदुधकुण्ड नगरपालिका वडा नं. ५ सल्लेरी, सोलुखुम्बुको तिनकुने क्षेत्रबाट कारागार, गुम्बा क्षेत्र, जिमी राई उत्थान समाज, क्याम्पस लगायतका क्षेत्रमा सवारी साधन आवतजावतका लागि सडक खोल्ने कार्य शुरु भएको छ ।

बिगत लामो समयदेखि नेपाली सेनाले उपभोग गर्दै आएको सो क्षेत्रमा नेपाल सरकारका रक्षा मन्त्री एवं सोलुखुम्बुबाट प्रतिनिधि सभा सदस्य निर्वाचित मानवीर राईको पहलमा सो बाटो संचालनका लागि सहमति भएको हो । मन्त्री राईले पटक पटक नेपाली सेनाका प्रधानसेनापति तथा अन्य सम्बन्धित क्षेत्रमा सम्वाद गर्दै स्थानियको आवश्यक्तालाई मध्यनजर गरी तत्कालै बाटो खोल्न प्रयास थालेका थिए । हाललाई एम्बुलेन्स, जिप, मोटरसाईकल जस्ता हलुका सवारी साधन मात्र संचालनका लागि बाटो खोल्ने सहमति भएको पनि रक्षा मन्त्री मानवीर राईले जानकारी दिए ।

साझा प्रेससँग कुराकानी गर्दै मन्त्री राईले आगामी दिनमा सो क्षेत्रको जमिनको अवस्थालाई मध्यनजर गरी सडक स्तरोन्नतीको कार्यमा पनि आफु लाग्ने प्रतिबद्धता जनाए ।

सो क्षेत्रमा पहिरो तथा जमिन भासिने समस्या समेत रहेकाले यसअघि बैकल्पिक रुपमा व्यक्तिगत जग्गाबाट सडक बनाई प्रयोगमा ल्याईएको थियो । तथापि सो सडक अबरुद्ध भएपश्चात हाल आवाडाँडाबाट तिनकुने हुँदै माथिल्लो क्षेत्र जाने बाटो खोलिएको हो ।

सो सडक खोल्नका लागि स्थानियबासीले जनश्रमदान गरेका छन् । जमिन नै कमसल र भासिने भएकाले डोजर तथा जेसिबी जस्ता हेभि गाडी प्रयोग नगरी स्थानियहरुबाट नै बाटो खोल्ने कार्य गरिएको स्थानिय रामसंघर्ष किराँतीले जानकारी दिए । उनका अनुसार सडकको पहुँचबाट बञ्चित भएका सल्लेरी माथिल्लो क्षेत्रका बासिन्दाहरुको सहभागितामा सडकको ट्रयाक खोल्न श्रमदान गरिएको हो ।

नगरपालिका क्षेत्रको एउटा महत्वपुर्ण बस्ती रहेको एवं जिल्ला अदालत, जिल्ला कारागार, सरकारी वकिल लगायतका कार्यालय, बिद्यालय, क्याम्पस तर्फ सवारी साधन आवतजावत गर्ने सडक नै नहुँदा समस्या झेल्दै आएका स्थानिय तथा सेवाग्राहीलाई सडकको ट्रयाक ओपनसँगै उत्साह छाएको छ ।

सोलुदुधकुण्ड नगरपालिकाका प्रमुख नाम्गेल जाङ्बु शेर्पाले सडक संचालनका लागि नेपाली सेनाले सहमति दिएसँगै सहज भएको बताए । उनले सो सडक स्तरोन्नतीक लागि नगरपालिकाले आगामी दिनमा आवश्यक सहयोग गर्ने समेत बताए ।