थामेका बाढी पिडितलाई माप्यले २८ लाख राहत दिने

सोलुखुम्बुको माप्य दुधकोशी गाउँपालिकाले थामेका बाढी पीडितलाई २८ लाख राहत दिने भएको छ । गत साउन ३२ गते हिमताल फुटेर आएको बाढीका कारण समस्यामा परेका खुम्बु पासाङल्हामु गाउँपालिका वडा नम्बर ५ थामेका स्थानीयलाई छिमेकी पालिका माप्य दुधकोशीले २८ लाख रुपैंया राहत रकम उपलब्ध गराउने भएको हो ।

थामेका नागरिकको समस्या समाधान र त्यहाँको पुनःनिर्माणमा सहयोग गर्ने उद्देश्यले २८ लाख नगद रकम खुम्बु पासाङल्हामु गाउँपालिका मार्फत उपलब्ध गराइने माप्य दुधकोशी गाउँपालिका अध्यक्ष बुद्धि किरण राईले बताए । अध्यक्ष राईका अनुसार साउन ३२ गतेको थामेको बाढीले क्षति भएको माप्य खुम्बु मितेरी मोटरेबल पुलको निर्माणको प्रकृया तत्काल थाल्ने कार्यपालिकाले निर्णय गरेको छ ।

आईतबार बसेको कार्यपालिका बैठकले चाडपर्वको समयमा पालिका भित्रका सडक र बाटोघाटो सरसफाई गर्ने, स्वास्थ्य सेवालाई प्रभावकारी बनाउने र मौषममा आएको बदलिका कारण हुनसक्ने क्षति न्यूनिकरण गर्न सतर्कता अपनाउन अपिल गर्नेलगायतका निर्णय गरेको छ ।