३० किलोको खुकुरी बन्यो पाल्पामा

पाल्पाका सन्तोष विश्वकर्माले एउटा खुकरी नै ३० किलोको बनाएर रेकर्ड बनाएका छन् । पाल्पा रामपुरका विश्वकर्माले सो खुकुरीको मुल्य नै १ लाख ११ हजार रुपैंया राखेका छन् ।

सो खुकुरी रामपुरमा जारी चौथो रामपुर महोत्सव तथा व्यापार मेलामा प्रदर्शनीमा राखिएको छ । खुकुरी यतिबेला मेलाको मुख्य आकर्षण बनिरहेको छ । नेपालीको शानको रूपमा लिइने खुकुरीको महत्व जोगाइ राख्न र नयाँ पुस्तालाई जानकारी दिन ३० किलो तौल भएको खुकुरी तयार पारेको उनको भनाई छ ।

३० किलो खुकुरी आठ फिट लामो छ भने दाप सहित ४२ किलोको छ । तीन जना व्यक्तिको सहायता लिएर २० दिनमा खुकुरी तयार पारेको विश्वकर्माले जानकारी दिए । उनका अनुसार खुकुरी निर्माणमा ज्याला खर्च बाहेक ३० हजार बराबरको खर्च भएको छ ।

मेला अवलोकन गर्न आउने दर्शकले रोचक मान्दै खुकुरी अवलोकन गर्ने, फोटो, भिडियो खिच्ने तथा टिकटक बनाएर सामाजिक सञ्जालमा राख्न थालेपछि धेरै चर्चा बटुलेको छ । विश्वकर्माले खुकुरीका अलवा कृषि तथा घरायसी प्रयोजनका लागि आवश्यक फलामका औजार पनि मेलाको अवसरमा बिक्रीमा राखेका छन् ।

रामपुर उद्योग वाणिज्य सङ्घको आयोजनामा गत माघ १५ गतेदेखि सुरू भएको चौथो रामपुर महोत्सव तथा व्यापार मेला २७ गतेसम्म चल्नेछ । मेलामा स्थानीय उत्पादनमा दर्शकको आकर्षण बढिरहेको छ ।