जलवायू परिवर्तनको उपलब्धी कार्यान्वयन हुन्छ : मन्त्री शाही

वन तथा वातावरण मन्त्री ऐनबहादुर शाही ठकुरीले जलवायु परिवर्तनको क्षेत्रमा मुलुकले पैरवी गरी प्राप्त उपलब्धि कार्यान्वयन गर्ने तर्फ मन्त्रायलको ध्यान केन्द्रित भएको बताएका छन् ।

मन्त्रालयद्वारा आज आयोजित २९ औं विश्व जलवायु सम्मेलनको समिक्षा कार्यक्रममा उनले उक्त उपलब्धि कार्यान्वयनका लागि आवश्यक कानुन निर्माण र संस्थागत सुधारका लागि पहल गरिसकेको बताए । मन्त्री शाहीले जलवायु संकटसँग जुध्न कुनै एक देश वा समुदायले मात्र सम्भव नरहेको समेत जिकिर गरे ।

सम्मेलनको दौरानमा नेपालमा जलवायु अनुकुलनका लागि आवश्यक सहयोग जुटाउने प्रकृयाका लागि “राष्ट्रिय प्रकृति संरक्षण कोष” संयुक्त राष्ट्र संघअन्तर्गतको अनुकूलन कोषको कार्यान्वयन गर्ने संस्थाका रुपमा सूचिकृत हुनु अर्काे सफलता भएको मन्त्री शाहीको भनाई थियो ।

मन्त्री शाहीले सन् २०३५ सम्मका लक्ष्यहरु सहितका नयाँ ‘एनडिसी’ बनाउने प्रकृया मन्त्रालयले अघि बढाएको जानकारी दिँदै जलवायु परिवर्तनका बारेमा राष्ट्रिय र अन्तर्राष्ट्रिय सहभागिता सहित सगरमाथा संवाद आयोजनाको तयारी गरिरहेको जानकारी गराए ।

संयुक्त राष्ट्रसङ्घीय जलवायु परिवर्तन प्रारुप महासन्धीका पक्ष राष्ट्रहरुको २९ औँ सम्मेलन गत कात्तिक २६ गतेदेखि मङ्िसर ७ गतेसम्म अजरबैजानको बाकुमा भएको थियो । राष्ट्रपति रामचन्द्र पौडेलको नेतृत्वमा नेपाली प्रतिनिधिमण्डलले सम्मेलनमा भाग लिएको थियो ।