खोटाङमा २ युवक रकम असुल्दै गर्दा पक्राउ

अपाङ्गताको नक्कली कागपत्र देखाउदै सहयोग रकम उठाउदै हिडेका २ युवकलाई खोटाङमा नेपाल प्रहरीले प्रक्राउ गरेको छ ।

ईलाका प्रहरी कार्यालय, ऐसेलुखर्क, खोटाङबाट खटिएको टोलीले बोल्न नसक्ने तथा कान नसुन्ने भन्दै स्थानियसँग सहयोग रकम उठाउदै गरेको अवस्थामा उनिहरुलाई पक्राउ गरेको हो । उनिहरुले शहीद लखन गाउँपालिका गाउँ कार्यपालिका गोरखाले उपलब्ध गराएको भन्दै नक्कली पत्र देखाएर रकम उठाई रहेको प्रहरीले जनाएको छ ।

दीपेन्द्रकुमार शर्मा र सन्तोषकुमार शर्मालाई आर्थिक सहयोग गरी दिन भनी उपलब्ध गराएको नक्कली पत्रका आधारमा ऐसेलुखर्क गाउँपालिकाका स्थानीयवासीसँग चन्दा माग्दै हिँड्ने ती युवालाई प्रहरीले सोमबार पक्राउ गरेको हो ।

पक्राउ पर्नेमा बारा जितपुर सिमरा उपमहानगरपालिका–५ गढीमाईका १९ वर्षीय अजयराम चमार र जितेन्दरराम चमार रहेको जिल्ला प्रहरी कार्यालयका सूचना अधिकारी मोहन पोखरेलले जानकारी दिनुभयो । पोखरेललका अनुसार शहीद लखन गाउँपालिकामा जम्मा ९ वटा मात्रै वडा छ । उनीहरुले प्रयोग गर्दै आएको आर्थिक सहयोगको पत्रमा ११ नं. वडा लेखिएको पाईएको छ ।

शहीद लखन गाउँपालिका वडा नं ११ ले आर्थिक सहयोगका लागि भनेर दिएको पत्रमा वडाध्यक्षले मङ्सिर १० गते हस्ताक्षर गरेर सिफारिस दिएको देखिन्छ । तर, सिफारिसपत्रमा हस्ताक्षर गर्ने वडाध्यक्षको नाम भने उल्लेख छैन ।

पक्राउ परेका दुवै जनाविरुद्ध अवैध चन्दा ऐनअन्तर्गतको कसुरमा खोटाङ जिल्ला अदालतबाट तीन दिनको म्याद थप गरेर अनुसन्धान थालिएको प्रहरीले जनाएको छ ।

प्रहरीले उनीहरूको साथबाट विभिन्न कागजपत्र, नक्कली बिरामीको फोटो र नगद रु १७ हजार सात सय ६० बरामद गरेको जनाएको छ । पक्राउ परेका उनीहरूले एक जना व्यक्तिबाट बढीमा रु एक हजारसम्म सहयोग रकम भनेर लिएको देखिएको प्रहरीले जनाएको छ ।

पक्राउ परेका उनीहरू दुवै जनामाथि कीर्ते जालसाजीसम्बन्धी मुद्दामा अनुसन्धान सुरु गरिएको जिल्ला प्रहरी कार्यालयका प्रमुख प्रहरी नायब उपरीक्षक प्रतीक विष्टले जानकारी दिए ।