जी–२० शिखर सम्मेलनको पुर्वसन्ध्यामा ब्राजिलमा बम बिष्फोट

ब्राजिलमा जी–२० शिखर सम्मेलनको पुर्वसन्ध्यामा बम बिष्फोट हुँदा एक व्यक्तिको मृत्यु भएको छ ।

बुधबार ब्राजिलको सर्वोच्च अदालत नजिकै विस्फोटक पदार्थ बोकेका एक व्यक्तिको आत्मघाती आक्रमणका क्रममा मृत्यु भएको प्रहरीले जनाएको छ ।

ब्रासिलियाका उपराज्यपाल सेलिना लेओले प्रारम्भिक जानकारीअनुसार यो ‘आत्मघाती’ आक्रमणको प्रयास भएको बताए । सो विष्फोटमा आक्रमणकारीको मात्र मृत्यु भएको तथा अन्य कसैलाई पनि चोट पटक नलागेको बताईएको छ ।

अमेरिकी राष्ट्रपति जो बाइडेन र चीनका राष्ट्रपति सी चिनफिङसहित विश्वका नेताहरूको सहभागितामा आगामी सोमबारदेखि सुरु हुने जी–२० शिखर सम्मेलनको पूर्वसन्ध्यामा अधिकारीहरूले देशमा सुरक्षा व्यवस्था कडा पारिसकिएको बताएका छन् ।

राष्ट्रपति सी बुधबार ब्राजिलियाको राजकीय भ्रमणका लागि त्यसतर्फ प्रस्थान गर्ने कार्यक्रम छ ।

सर्वोच्च अदालतले एक विज्ञप्ति जारी गर्दै बुधबारको सत्रको अन्त्यमा दुईवटा विष्फोट भएको र न्यायाधीशहरुलाई सकुशल बाहिर निकालिएको जनाएको छ ।