८४ को चुनाव अघि नै संविधान संशोधन हुन्छः महासचिव पोखरेल

नेकपा एमालेका महासचिव शंकर पोखरेलले २०८४ अघि नै संविधान संशोधन हुने खुलासा गरेका छन् ।

मंगलबार विराटनगर विमानस्थलमा पत्रकारसँग कुरा गर्दै महासचिव पोखरेलले धेरै दलमा जनमत विभाजन हुँदा प्रमुख दलहरू माथि साना दलहरूले शासन गर्ने परिपाटी रोक्नलाई २०८४ को निर्वाचन अघि नै संविधान संशोधन गरिने स्पष्ट पारे । उनले यस काममा नेकपा एमाले र नेपाली कांग्रेसको मूलभूत जिम्मेवारी भए पनि देशका सबै राजनीतिक दलसँगको संवाद, छलफल र सहमतिबाट संविधान संशोधनको काम हुने पनि जिकिर गरेका छन् ।

पत्रकारसँगको भेटमा महासचिव पोखरेलले संविधान कार्यान्वयनको १० वर्षका सबल र दुर्बल पक्ष समीक्षा गरी संशोधन गर्दै अघि बढ्नु पर्ने पनि बताएका छ ।

पोखरेलले कांग्रेस र एमाले मिलेर साना दललाई समाप्त पार्न नखोजेको बताउँदै जसले राजनीति गर्न चाहन्छ उसले आफूलाई बलियो भने बनाउनु पर्ने स्पष्ट पारे । साना दलले म्याजिक नम्बर पायौँ भन्दै शासन गर्ने परम्परा अन्त्य हुनु पर्ने उनको भनाई थियो ।

पोखरेलले जुन राष्ट्रिय उद्देश्य बोकेर नेकपा एमाले र कांग्रेस अघि बढिरहेका छन् त्यस उद्देश्यमा सहयोग गर्नको लागि केन्द्रदेखि जिल्ला तहसम्म दुई दलीय संयन्त्र बनाउन लागिएको पनि जानकारी दिए ।

कार्यक्रममा महासचिव पोखरेल सहित नेकपा एमाले स्थाई कमिटी सदस्य एवं नेकपा एमाले, कोशी प्रदेश ईन्चार्ज शेरधन राई, कोशी प्रदेशका मुख्य मन्त्री हिक्मतकुमार कार्की लगायत नेकपा एमालेका नेताहरुको उपस्थिती रहेको थियो ।