पुर्व मन्त्री मनाङे पक्राउ

सर्वोच्चको आदेशपछि ज्यान मार्ने उद्योगमा गण्डकी प्रदेशका पुर्व मन्त्री दिपक मनाङे पक्राउ परेका छन् ।

२०६१ सालमा नै अर्का डन मिलन चक्रे उर्फ मिलन गुरुङ माथि तरबार प्रहार गरेको आरोपमा परेको मुद्धामा सर्वोच्च अदालतले अन्तिम फैसला गरेपछि प्रहरीले मनाङे बिरुद्ध पक्राउ पुर्जि जारी गरी खोजी गरिरहेको थियो । उनलाई प्रहरीले मंगलबार काठमाडौंको सानो भर्याङबाट पक्राउ गरेको हो ।

चक्रे उपर ज्यान मार्ने उद्योग गरेको भन्दै तत्कालिन समयमा जिल्ला सरकारी वकिल कार्यालय काठमाडौंले मनाङे समूहविरुद्ध कर्तव्य ज्यान मुद्दा दर्ता गरेको थियो । तर, जिल्ला अदालत काठमाडौंले कर्तव्य ज्यान नभई कुटपिट भएको ठहर गर्दै मनाङेलाई २ वर्ष जेल सजाय सुनायो भने गणेश लामा, रेवत कार्की, रमेश सुनुवार र उमेश लामालाई सफाइ दियो ।

त्यो फैसलाविरुद्ध सरकारी वकिलको कार्यालय पुनरावेदन अदालत पाटन गयो । अदालतले ०६९ मा ज्यान मार्ने उद्योग (प्रयास) गरेको ठहर गर्दै मनाङेलाई ५ वर्ष जेल सजाय सुनायो भने अरुलाई सफाइ दिने जिल्ला अदालतको फैसलालाई सदर गर्यो ।

सरकारी वकिलको कार्यालय मनाङे बाहेकका चार जनालाई पनि सजाय माग गर्दै सर्वोच्च गएको थियो । त्यही मुद्दामा २०७५ सालमा न्यायाधीश दीपकराज जोशी र पुरुषोतम भण्डारीको संयुक्त इजलासले पुनरावेदनकै फैसला सदर गरेको थियो ।

तत्कालीन पुनरावेदन अदालत पाटनले ५ वर्ष कैद सजाय सुनाएपछि मनाङे पक्राउ परेका थिए । तर १० वर्ष भन्दा कम जेल सजाय भएको मुद्दामा जेलबाहिर रहेर पुर्पक्ष गर्न पाइने कानुनी व्यवस्था अनुसार उनी रिहा भएका थिए ।

सर्वोच्चमा मुद्दा विचाराधीन रहेकै अवस्थामा मनाङले मनाङबाट दुई कार्यकाल गण्डकी प्रदेशसभा सदस्य चुनिए भने पटक–पटक मन्त्री बनि सकेका छन् ।