अमेरिकामा राष्ट्रपति पदका लागि आज मतदान

नयाँ राष्ट्रपति चयनका लागि मंगलबार अर्थात आज अमेरिकामा निर्वाचन हुँदैछ । राष्ट्रपति पदका लागि डेमोक्र्याटबाट कमला ह्यारिस र रिपब्लिकनका तर्फबाट डोनाल्ड ट्रमपबीच प्रतिस्पर्धा हुँदैछ ।

आज मतदान भएसँगै यो प्रतिस्पर्धा निष्कर्षमा पुग्नेछ ।

दुवै उम्मेदवारले सोमबार अन्तिम चुनावी अभियान चलाएका थिए । उनीहरू दुवैले अमेरिकाको सबैभन्दा महत्वपूर्ण मानिने पेन्सिलभेनिया राज्यमा प्रचार गरेका थिए ।

निर्वाचन सर्वेक्षण अनुसार दुई उम्मेदवारबीच कडा प्रतिस्पर्धा हुने देखाएको छ । केही सर्वेक्षणमा ह्यारिस ट्रम्पभन्दा थोरै अघि देखिएकी छन् ।

अमेरिकामा सात करोड ८० लाखभन्दा बढी मतदाताले पहिले नै मतदान गरिसकेका छन् । यो सन् २०२० मा खसेको कूल मतको लगभग आधा हो ।

सम्भावित हिंसाबाट बच्न गुप्तचर संस्थाको विज्ञप्ती

अमेरिकी गुप्तचर संस्थाहरुले अमेरिकी चुनावमा कथित विदेशी हस्तक्षेप हुन सक्ने एवं हिंसा भड्कन सक्ने चेतावनी दिएको छ ।

चुनावमा अमेरिकी जनमत हेरफेर गर्ने विश्वव्यापी प्रयासहरू र परिणाम स्वरूप हुन सक्ने सम्भावित हिंसाको बारेमा चेतावनी दिँदै सोमबार एक विज्ञप्ति जारी गर्यो ।

अमेरिकी खुफिया एजेन्सीहरुले भनेका छन्, “विदेशी प्रतिद्वन्द्वीहरू, विशेष गरी रुस, अमेरिकी चुनावको अखण्डतामा जनताको विश्वासलाई कमजोर पार्ने उद्देश्यले थप प्रभावकारी अपरेशनहरू सञ्चालन गर्दै आएको र अमेरिकीहरू बीचको विभाजनलाई नियालिरहेको छ,” ।

एफबीआई, राष्ट्रिय खुफिया निर्देशकको कार्यालय, साइबर सुरक्षा र पूर्वाधार सुरक्षा एजेन्सीले चुनावको दिन तथा आउँदो हप्ताहरूमा यो कार्य तीव्र हुन सक्ने संकेत गरेको छ ।