जापानको नायोगामा सम्पन्न २०औँ एसियन गेम्समा कांस्यपदक जित्न सफल नेपाली खेलाडी, प्रशिक्षक तथा व्यवस्थापकले सरकारबाट पुरस्कार रकम प्राप्त गरेका छन्।
सरकारले खेलकुद विकास नियमावलीअनुसार करातेका तेञ्जिङ शर्मा र महिला कबड्डी टोलीसहित उनीहरूका प्रशिक्षक तथा व्यवस्थापकको बैंक खातामा पुरस्कार रकम जम्मा गरिदिएको हो।
यसअघि २३ असोजमा बसेको मन्त्रिपरिषद् बैठकले पदक विजेता खेलाडी तथा सम्बन्धित प्रशिक्षक र व्यवस्थापकलाई पुरस्कार दिने निर्णय गरेको थियो।
निर्णयअनुसार करातेमा कांस्यपदक जितेका तेञ्जिङ शर्माले ६ लाख ५० हजार रुपैयाँ प्राप्त गरेका छन्। उनका प्रशिक्षक कुशल श्रेष्ठले १ लाख ३० हजार र व्यवस्थापक युवराज लामाले ६५ हजार रुपैयाँ पाएका छन्।
त्यस्तै, कांस्यपदक विजेता महिला कबड्डी टोलीका प्रत्येक खेलाडीले जनही १ लाख ९५ हजार रुपैयाँ पुरस्कार पाएका छन्। टोलीकी मुख्य प्रशिक्षक पार्वती राईले १ लाख ३० हजार रुपैयाँ प्राप्त गर्दा सहायक प्रशिक्षक लोकबहादुर विष्ट र व्यवस्थापक शरद दर्शनाधारीले समान ६५ हजार रुपैयाँ पाएका छन्।
जापानको नायोगामा आयोजना भएको २०औँ एसियन गेम्समा नेपालले करातेका तेञ्जिङ शर्मा र महिला कबड्डी टोलीको प्रदर्शनमार्फत कांस्यपदक जितेको थियो। पदक विजेता खेलाडी तथा टोलीसँग सम्बन्धित प्रशिक्षक र व्यवस्थापकलाई प्रोत्साहनस्वरूप सरकारले पुरस्कार उपलब्ध गराएको हो।
प्रतिक्रिया