ओखलढुङ्गा । रसुवाको भोटेकोशी नदीमा आएको विनाशकारी बाढीबाट प्रभावित नागरिकको उद्धार, राहत, उपचार तथा पुनःस्थापनाका लागि ओखलढुङ्गाको सुनकोशी गाउँपालिकाका कर्मचारी र जनप्रतिनिधिले आर्थिक सहयोग गर्ने भएका छन् ।
गाउँ कार्यपालिकाको बैठकले गाउँपालिका तथा मातहतका कार्यालय र विद्यालयमा कार्यरत सम्पूर्ण कर्मचारीको तीन दिन बराबरको तलब तथा जनप्रतिनिधिले प्राप्त गर्ने तीन दिन बराबरको सेवा–सुविधा रकम कट्टा गरी प्रधानमन्त्री दैवी प्रकोप उद्धार कोषमा जम्मा गर्ने निर्णय गरेको हो ।
बाढीबाट ठूलो मानवीय तथा भौतिक क्षति भएको भन्दै विपद्को समयमा पीडित नागरिकको उद्धार, राहत, उपचार तथा पुनःस्थापनामा सहयोग पुर्याउने उद्देश्यले आर्थिक सहयोग गर्ने निर्णय गरिएको गाउँपालिका अध्यक्ष कमल तामाङले बताए । विपद् प्रभावितको उद्दार, उपचार, राहत र पुनःस्थापना का लागि सबैले सक्दो सहयोग गर्नुपर्ने अध्यक्ष तामाङको भनाइ छ ।
सुनकोशी गाउँपालिकाको निर्णयलाई विपद्का बेला स्थानीय तहका जनप्रतिनिधि र कर्मचारीले आफ्नो सेवा–सुविधाबाट समेत योगदान गर्ने उदाहरणका रूपमा हेरिएको छ ।
सरकारले पनि रसुवाको भोटेकोशी बाढी प्रभावितको राहत, उद्धार र पुनःस्थापनाका लागि प्रदेश, स्थानीय तह तथा सार्वजनिक निकायमा कार्यरत कर्मचारीलाई विपद् उद्धार कोषमा योगदान गर्न आह्वान गरेको छ ।
प्रतिक्रिया