कर्णाली प्रदेशका मुख्यमन्त्री मंगलबहादुर शाहीले आज प्रदेशसभाबाट विश्वासको मत लिँदै छन् । विश्वासको मतका लागि प्रदेशसभाको बैठक दिउँसो ३ बजे बोलाइएको छ ।
नेकपा एमालेको समर्थनमा साउन १२ गते मुख्यमन्त्री नियुक्त भएका शाहीले संवैधानिक व्यवस्थाअनुसार विश्वासको मत लिन लागेका हुन् ।
तर, विश्वासको मत लिनुअघि नै सत्ता साझेदार दलहरूबीच असन्तुष्टि देखिएको छ । नेकपा र एमालेबीच मन्त्रालय बाँडफाँटको विषयमा सहमति जुट्न नसक्दा सरकार गठन भएको तीन साता बितिसक्दा पनि मन्त्रिपरिषद् विस्तार हुन सकेको छैन । हाल मुख्यमन्त्री शाही नेतृत्वको सरकारमा उनी एक्लै छन् ।
मन्त्रालय बाँडफाँटबारे छलफल टुंगोमा पुग्नुअघि नै मुख्यमन्त्रीले विश्वासको मतको प्रक्रिया अघि बढाएपछि एमालेभित्र असन्तुष्टि बढेको बताइएको छ ।
एमालेका एक नेताका अनुसार मन्त्रालयको भागबन्डामा सहमति नहुँदै विश्वासको मतको प्रक्रिया अघि बढाउँदा सत्ता गठबन्धनभित्र अविश्वासको वातावरण बनेको छ । मुख्यमन्त्रीले एमालेको समर्थन नपाए पनि कांग्रेसको साथ लिएर सरकार अघि बढाउन सक्ने सम्भावनाबारे समेत एमालेले चासो व्यक्त गरेको छ ।
४० सदस्यीय कर्णाली प्रदेशसभामा विश्वासको मत प्राप्त गर्न २१ सांसदको समर्थन आवश्यक पर्छ । सत्ता साझेदार नेकपा र एमालेसँग गरी २४ सांसद रहेकाले गठबन्धनमा एकता कायम रहे मुख्यमन्त्री शाहीले सहजै विश्वासको मत पाउने अवस्था छ ।
तर, एमालेभित्र देखिएको असन्तुष्टिले विश्वासको मतअघि नै कर्णालीको सत्ता समीकरणबारे नयाँ प्रश्न खडा गरेको छ ।
मुख्यमन्त्री शाहीले भने विश्वासको मत लिएपछि सत्ता साझेदार दुई दलबीच सहमति गरेर मन्त्रिपरिषद् विस्तार गर्ने बताउँदै आएका छन् ।
अबको प्रदेशसभा बैठकले मुख्यमन्त्री शाहीको सरकारलाई निरन्तरता दिने मात्र नभई नेकपा–एमाले सत्ता सहकार्य कति बलियो छ भन्ने संकेतसमेत दिने देखिएको छ ।
प्रतिक्रिया