नेपाली कांग्रेसको संस्थापन इतर पक्षले राष्ट्रिय भेला आयोजना गर्ने घोषणा गरेको छ। नेपाली कांग्रेसका संस्थापक नेता बिपी कोइरालाको ४४औँ स्मृति दिवसका अवसरमा बुधबार काठमाडौंमा आयोजित कार्यक्रममा नेता प्रकाशमान सिंहले साउन २९ गते काठमाडौंमा राष्ट्रिय भेला आयोजना गर्ने घोषणा गरेका हुन्।
सिंहका अनुसार संस्थापन इतर पक्षले यसअघि सातै प्रदेशमा प्रदेशस्तरीय भेला सम्पन्न गरिसकेको छ। अब हुने राष्ट्रिय भेलाले समूहको आगामी राजनीतिक रणनीति तय गर्ने उनले बताए।
‘हामीले सातै प्रदेशमा भेला गरिसकेका छौँ। अब साउन २९ गते काठमाडौंमा राष्ट्रिय भेला गर्छौँ,’ सिंहले भने, ‘यो भेलापछि हामी आफ्नो बाटो लिन्छौँ।’
उनले नेपाली कांग्रेसको १५औँ महाधिवेशन पार्टीको एकता कायम राख्ने गरी हुनुपर्ने धारणा राखे। विशेष र नियमित महाधिवेशनको बहसले पार्टीभित्र विभाजनको अवस्था सिर्जना भएकाले सहमतिका आधारमा अघि बढ्नुपर्ने उनको भनाइ थियो।
कार्यक्रममा संस्थापन इतर पक्षका नेताहरूले वर्तमान पार्टी नेतृत्वप्रति असन्तुष्टि पनि व्यक्त गरेका छन्। उनीहरूले पार्टी नेतृत्वले आन्तरिक सहमति र संवादका लागि पर्याप्त पहल नगरेको आरोप लगाएका छन्।
त्यसक्रममा केही नेताहरूले विशेष महाधिवेशनको प्रक्रियाप्रति असन्तुष्टि जनाउँदै वर्तमान सभापति गगन थापाको नेतृत्वको आलोचना गरेका थिए। उनीहरूले साउनभित्र सहमतिको प्रयास सफल नभए वैकल्पिक राजनीतिक कदम चाल्ने चेतावनीसमेत दिएका छन्।
संस्थापन इतर पक्षको साउन २९ गते हुने राष्ट्रिय भेलालाई कांग्रेसभित्रको आन्तरिक शक्ति सन्तुलन र आगामी राजनीतिक दिशाबारे महत्त्वपूर्ण मानिएको छ। उक्त भेलाबाट समूहको आगामी रणनीति तथा संगठनात्मक निर्णय सार्वजनिक हुने अपेक्षा गरिएको छ।
प्रतिक्रिया