नारायणगढ–मुग्लिन सडक आज राति १० बजेदेखि बन्द

लगातार वर्षा र थप वर्षाको पूर्वानुमानका कारण नारायणगढ–मुग्लिन–काठमाडौँ सडकखण्डमा आज (आइतबार) राति १० बजेदेखि अर्को सूचना जारी नभएसम्म सबै प्रकारका सवारीसाधनको आवागमन बन्द गरिने भएको छ।

जिल्ला प्रशासन कार्यालय, चितवनले जारी गरेको सूचनाअनुसार धादिङलगायत छिमेकी जिल्ला तथा चितवनका विभिन्न स्थानमा निरन्तर वर्षा भइरहेकाले रातिको समयमा सवारी सञ्चालन गर्दा हुन सक्ने जोखिमलाई ध्यानमा राख्दै सडक बन्द गर्ने निर्णय गरिएको हो।

प्रमुख जिल्ला अधिकारी गणेश अर्यालद्वारा जारी सूचनामा यात्रुको सुरक्षालाई उच्च प्राथमिकता दिँदै नारायणगढ–मुग्लिन–काठमाडौँ सडकखण्डमा चल्ने सबै प्रकारका सवारीसाधनको आवागमन राति १० बजेदेखि अर्को सूचना प्रकाशित नभएसम्म रोक लगाइएको उल्लेख गरिएको छ।

जिल्ला सुरक्षा समिति, चितवनले यात्रुहरूमा पर्न गएको असुविधाप्रति क्षमायाचना गर्दै आवश्यक सूचना, समन्वय तथा सहजीकरणका लागि नेपाल प्रहरीको १००, सशस्त्र प्रहरी बल नेपालको १११४, जिल्ला आपत्कालीन सञ्चालन केन्द्र (डीईओसी) को १२३४ तथा जिल्ला प्रहरी कार्यालय, चितवनका सूचना अधिकारीको ९८५५०१३९९९ नम्बरमा सम्पर्क गर्न अनुरोध गरेको छ।