फ्रान्सलाई स्तब्ध पार्दै स्पेन फिफा विश्वकप २०२६ को फाइनलमा

युरोपेली जादुलाई विश्व मञ्चमा निरन्तरता दिँदै स्पेन फिफा विश्वकप २०२६ को फाइनलमा प्रवेश गरेको छ । अमेरिकाको टेक्सासस्थित डलास स्टेडियममा बुधबार बिहान भएको रोमाञ्चक तथा पहिलो सेमिफाइनल खेलमा फ्रान्सलाई २–० गोल अन्तरले स्तब्ध पार्दै स्पेनले उपाधि भिडन्तका लागि आफ्नो स्थान सुरक्षित गरेको हो ।

स्पेन विश्वकपको फाइनलमा पुगेको यो १६ वर्षपछिको पहिलो पटक हो । यसअघि सन् २०१० मा दक्षिण अफ्रिकामा भएको विश्वकपमा फाइनल पुगेर स्पेनले उपाधि जितेको थियो ।

खेलको मुख्य हाइलाइट्स

पहिलो गोल (२२औँ मिनेट): खेलको २०औँ मिनेटमा फ्रान्सका लुकास डिग्नेले स्पेनका युवा स्टार लामिन यमललाई डिबक्स भित्र लडाएपछि स्पेनले पेनाल्टीको अवसर पाएको थियो । उक्त अवसरलाई सदुपयोग गर्दै मिकेल ओयार्साबाल (Mikel Oyarzabal) ले उत्कृष्ट गोल गर्दै टोलीलाई १–० को अग्रता दिलाए । यो उनको प्रतियोगिताकै पाँचौँ गोल हो ।

दोस्रो गोल (५८औँ मिनेट): पहिलो हाफमा एक गोलको अग्रता बनाएको स्पेनले दोस्रो हाफमा पनि आक्रामक खेल जारी राख्यो । ५८औँ मिनेटमा पेड्रो पोरो (Pedro Porro) ले उत्कृष्ट प्रहार गर्दै बललाई जाली चुमाएपछि स्पेनले २–० को अग्रता लियो र जित सुनिश्चित गर्‍यो ।

फिक्का बन्यो फ्रान्सेली आक्रमण

लागातार तेस्रो पटक विश्वकपको फाइनल पुग्ने दाउमा रहेको फ्रान्सका लागि यो पराजय निकै पिडादायी बन्यो । कप्तान किलियन एम्बाप्पे (Kylian Mbappé) र ओसमान डेम्बेले जस्ता विश्वस्तरीय फरवार्डहरू सम्मिलित फ्रान्सेली टोलीले स्पेनको मजबुत रक्षापंक्तिलाई तोड्न सकेनन् । खेलको अन्तिम समयतिर एम्बाप्पेले गरेको प्रहार क्रसबार माथिबाट बाहिरिएको थियो भने खेलभरि फ्रान्स निकै दबाबमा देखियो ।

२९औँ मिनेटमा प्रमुख डिफेन्डर विलियम सालिबा चोटका कारण मैदान बाहिरिएपछि फ्रान्सको रक्षापंक्ति झनै कमजोर बनेको थियो ।

फाइनल यात्रा र आगामी समीकरणयस ऐतिहासिक जितसँगै स्पेनले अब उपाधिका लागि दोस्रो सेमिफाइनलको विजेतासँग भिड्नेछ, जहाँ अर्जेन्टिना र इङ्गल्यान्डबीच प्रतिस्पर्धा हुँदैछ । पराजित फ्रान्सले भने तेस्रो स्थानका लागि आगामी जुलाई १८ मा मियामीमा खेल्नुपर्नेछ ।विश्वकप २०२६ को महाभिडन्त (फाइनल खेल) आगामी जुलाई १९ मा न्यूयोर्क/न्यूजर्सी स्टेडियममा हुने तय भएको छ ।