एशियाली खेलकुद क्रिकेट छनोट प्रतियोगिताको उपाधिका लागि आज नेपाल र हङकङबीच प्रतिस्पर्धा हुँदैछ। सिंगापुरस्थित नेश्नल क्रिकेट मैदानमा हुने फाइनल खेल नेपाली समयअनुसार दिउँसो १२:१५ बजे सुरु हुनेछ।
लगातार उत्कृष्ट प्रदर्शन गर्दै आएको नेपाल उपाधि जित्ने लक्ष्यसहित मैदान उत्रँदै छ। नेपालले सेमिफाइनलमा ओमानलाई ८ विकेटले पराजित गर्दै फाइनलमा स्थान बनाएको थियो। त्यस्तै हङकङले दोस्रो सेमिफाइनलमा मलेसियालाई ६ विकेटले हराउँदै उपाधि भिडन्तमा नेपालसँगको भेट पक्का गरेको हो।
नेपाल र हङकङबीच हालसम्म १४ अन्तर्राष्ट्रिय खेल भएका छन्। तीमध्ये नेपालले ७ खेल जितेको छ भने हङकङ ५ खेलमा विजयी भएको छ। दुई खेल भने नतिजाविहीन भएका थिए। यस तथ्यांकले आजको फाइनल प्रतिस्पर्धात्मक हुने संकेत गरेको छ।
यसअघि तेस्रो स्थानका लागि मलेसिया र ओमानबीच बिहान ७:१५ बजे खेल हुनेछ।
प्रतियोगिताका शीर्ष चार टोली नेपाल, हङकङ, मलेसिया र ओमानले आगामी एशियाली खेलकुदका लागि छनोट भइसकेका छन्। अब उपाधि कसले जित्ने भन्ने चासो क्रिकेट समर्थकमाझ बढेको छ।
हालको लयलाई कायम राख्न सके नेपालले एशियाली खेलकुद छनोट प्रतियोगिताको उपाधि जित्दै अर्को ऐतिहासिक सफलता हासिल गर्ने अपेक्षा गरिएको छ।
प्रतिक्रिया