वीरगञ्ज महानगरपालिकाका मेयर राजेशमान सिंह पक्राउ परेका छन्। जिल्ला प्रहरी कार्यालय पर्साले उनलाई आज बिहान पर्साको ठोरी क्षेत्रबाट पक्राउ गरेको जनाएको छ।
प्रहरीका अनुसार लिखत किर्तेसम्बन्धी कसुरमा जिल्ला अदालत पर्साले आठ दिनअघि नै मेयर सिंहसहित तीन जनाविरुद्ध पक्राउ पुर्जी जारी गरेको थियो। सोही पुर्जीका आधारमा प्रहरीले उनलाई नियन्त्रणमा लिएको हो।
स्थानीय लियाकत अलीले दिएको जाहेरीका आधारमा अदालतले पक्राउ पुर्जी जारी गरेको बताइएको छ। पक्राउपछि मेयर सिंहलाई जिल्ला प्रहरी कार्यालय पर्साको हिरासतमा राखिएको छ।
प्रहरीले घटनाबारे थप अनुसन्धान र सोधपुछ जारी रहेको जनाएको छ। यस प्रकरणमा पक्राउ पुर्जी जारी भएका अन्य व्यक्तिहरूको खोजी कार्य पनि भइरहेको प्रहरी स्रोतले जनाएको छ।
मेयर सिंहको पक्राउसँगै वीरगञ्जको राजनीतिक वृत्तमा तरंग उत्पन्न भएको छ भने घटनाबारे थप विवरण आउन बाँकी रहेको प्रहरीले जनाएको छ।
प्रतिक्रिया