बेलायतका प्रधानमन्त्री कियर स्टार्मरको भविष्यबारे सत्तारूढ लेबर पार्टीभित्रै विवाद चर्किएको छ। आज बिहान बस्ने मन्त्रिपरिषद् बैठकअघि नै सरकारभित्र मतभेद देखिँदा स्टार्मरमाथि राजीनामा दिन वा पदत्यागको समयसीमा घोषणा गर्न दबाब बढेको हो।
गृहमन्त्री शबाना महमूदसहित केही मन्त्रीहरूले प्रधानमन्त्रीले पद छाड्ने समयसीमा सार्वजनिक गर्नुपर्ने माग गरेका छन्। तर मन्त्रिपरिषद्भित्र यो धारणा अल्पमतमा रहेको बताइएको छ।
यसैबीच प्रधानमन्त्रीको कार्यालयले छ जना मन्त्रीका निजी सहयोगीहरूलाई हटाएको छ। तीमध्ये केहीले राजीनामा दिएका छन् भने केहीले प्रधानमन्त्रीले पदत्यागको समयसीमा घोषणा गर्नुपर्ने माग गरेका थिए।
लेबर पार्टीभित्र असन्तुष्टि तीव्र बन्दै गएको छ। हालसम्म ७२ जना सांसदले प्रधानमन्त्रीले राजीनामा दिन वा स्पष्ट समयसीमा घोषणा गर्नुपर्ने माग गरिसकेका छन्।
राजीनामा दिने सहयोगीहरूमा जो मोरिस, मेलानी वार्ड, नाउशाबाह खान र टम रुटल्याण्ड रहेका छन्। उनीहरूले प्रधानमन्त्रीले जनताको विश्वास गुमाइसकेको बताएका छन्।
त्यस्तै, गोरडन म्याकी र स्याली जेम्सनले पनि प्रधानमन्त्रीले छिट्टै पदत्यागको समयसीमा घोषणा गर्नुपर्ने माग गरेका छन्।
तर प्रधानमन्त्री स्टार्मरले भने आफू पद नछाड्ने अडान दोहोर्याएका छन्। उनले सरकारबाट केही गल्ती भएको स्वीकार्दै ठूला राजनीतिक निर्णयहरू भने सही रहेको दाबी गरेका छन्। उनले आलोचकहरूलाई गलत सावित गर्ने बताएका छन्।
हालै सम्पन्न स्थानीय निर्वाचनमा लेबर पार्टीले कमजोर प्रदर्शन गरेपछि दबाब झनै बढेको हो। इंग्ल्याण्डभर करिब १,५०० स्थानीय प्रतिनिधि गुमाएको पार्टी वेल्समा सत्ताबाट बाहिरिएको छ भने स्कटल्याण्डमा पनि ऐतिहासिक रूपमा कमजोर नतिजा आएको छ।
पार्टीभित्र नेतृत्व परिवर्तनको बहस तीव्र बन्दै गएको छ। ग्रेटर म्यानचेस्टरका मेयर एन्डी बर्नहम समर्थकहरूले पनि नयाँ नेतृत्वको माग गरिरहेका छन्।
पार्टीका नेतृ एन्जेला रेयनरले पार्टीले अझ राम्रो प्रदर्शन गर्नुपर्ने भन्दै मतदाताको असन्तुष्टि स्वीकार गर्नुपर्ने बताएकी छन्।
समग्रमा प्रधानमन्त्री स्टार्मर आफ्नो कार्यकालकै सबैभन्दा कठिन राजनीतिक संकटको सामना गरिरहेका छन्, जहाँ पार्टीभित्रको असन्तुष्टि र जनताको घट्दो समर्थनले उनको नेतृत्वमाथि गम्भीर प्रश्न खडा गरेको छ।
प्रतिक्रिया