साताको पहिलो कारोबार दिन सोमबार सेयर बजारमा उत्साहजनक सुधार देखिएको छ। नेप्से परिसूचक ३८.१९ अंक (१.३९ प्रतिशत) ले बढेर २७८३ अंकमा पुगेको छ, जुन दिनभरकै उच्च बिन्दु पनि हो।
बजार खुलेदेखि नै सकारात्मक लय समातेको नेप्से अन्तिम समयसम्म निरन्तर उकालो लाग्यो। यसअघि शुक्रबार पनि नेप्से २७ अंकले बढेको थियो, जसले लगानीकर्तामा थप आत्मविश्वास देखिएको संकेत गर्छ।
कारोबार रकममा समेत उल्लेख्य वृद्धि भएको छ। अघिल्लो दिन ३ अर्ब २८ करोड रुपैयाँको कारोबार भएकोमा आज ४ अर्ब ६१ करोड रुपैयाँ पुगेको छ। आज २४७ कम्पनीको सेयर मूल्य बढेको छ भने १८ कम्पनीको घटेको छ। ४ कम्पनीको मूल्य स्थिर रहेको छ।
सबै समूहका सूचकहरू बढेका छन्। अन्य समूह सबैभन्दा धेरै २.११ प्रतिशतले बढ्दा बैंकिङ १.०२, विकास बैंक १.३६, फाइनान्स १.८१, होटल तथा पर्यटन ०.६९, जलविद्युत् १.७९, लगानी १.२५, जीवन बीमा ०.९९, उत्पादन तथा प्रशोधन १.३०, माइक्रोफाइनान्स १.७०, निर्जीवन बीमा १.६० तथा व्यापार समूह १.१५ प्रतिशतले वृद्धि भएका छन्।
कम्पनीतर्फ फर्स्ट माइक्रोफाइनान्स लघुवित्तको सेयर मूल्य सबैभन्दा धेरै १४.१८ प्रतिशतले बढेको छ। त्यसैगरी दोल्ती पावर ८.४३, आत्मनिर्भर लघुवित्त ६.७८ र मेन्छियाम जलविद्युत् ६.६४ प्रतिशतले उकालो लागेका छन्।
घट्ने कम्पनीतर्फ त्रिशूली जलविद्युत् २.८७ प्रतिशतले सबैभन्दा धेरै घटेको छ। अघिल्लो दिन यही कम्पनीको मूल्य १० प्रतिशतले बढेको थियो। त्यस्तै झापा इनर्जी २.२३ र एसियन हाइड्रोपावर २.१० प्रतिशतले घटेका छन्।
आज सबैभन्दा धेरै कारोबार भएका कम्पनीहरूमा रिलायन्स स्पिनिङ मिल्स, नेसनल हाइड्रोपावर, एसवाई प्यानल, रिडी पावर र साहस ऊर्जा रहेका छन्।
समग्रमा, सेयर बजारमा देखिएको यो सुधारले लगानीकर्तामा सकारात्मक संकेत दिएको छ।
प्रतिक्रिया