सोलुखुम्बुका ६० यात्रु वैकल्पिक बाटोहुँदै १५ घण्टामा काठमाडौं आए

सोलुखुम्बुका ६० यात्रु वैकल्पिक बाटोबाट १५ घण्टाको यात्रा गरेर काठमाडौं आएका छन् । वर्षाका कारण सोलुखुम्बु–ओखलढुंगा–घुर्मी–खुर्कोटको बाटो अवरुद्ध भएपछि सल्लेरी–लामाजुरा–भकाञ्जे–भण्डार–रामेछाप–जिरी–चरिकोट–दोलखाहुँदै सोलुखुम्बुका नागरिक राजधानी आइपुगेका हुन् ।

लगातारको बर्षात्पछि सोलुखुम्बुबाट काठमाडौं आवतजावत गर्ने मुख्य सडक पूर्णरुपमा अवरुद्ध भएपश्चात वैकल्पिक सडक मार्फत यात्रुलाई गन्तव्यमा पुर्याईएको हो । सोलुदुधकुण्ड नगरपालिकाको सहजिकरणमा वैकल्पिक बाटो प्रयोगमा आएको छ ।

नगरपालिकाको संयोजन तथा स्थानिय यातायात व्यवसायीहरुको सहयोगमा बुधबार ७ वटा सुमो मार्फत ६० जना यात्रुलाई सकुशल काठमाण्डौ ल्याईएको दुधकोशी यातायात प्रालिका संचालक दोर्जी शेर्पाले साझा प्रेसलाई जानकारी दिए ।

बर्षात् पछि काठमाण्डौ आवतजावत गर्ने मुख्य सडक नै अवरुद्ध बनेपछि अलपत्र यात्रुलाई गन्तव्यमा पुर्याउन सोलुदुधकुण्ड नगरपालिकाका मेयर नाम्गेल जाङ्बु शेर्पाले पहल थालेका थिए । मेयर शेर्पा र यातायात व्यवसायीबीच भएको छलफलले कच्ची भएपनि नयाँ बाटोबाट यात्रुलाई गन्तव्यमा पुर्याउने योजना बनेको थियो ।

बर्षात् र बाढीपहिरोले निम्त्याएको समस्यापछि जिल्लाबासीको चाहना तथा आवश्यकतालाई मध्यनजर गरी पुरानो चर्चित पर्यटकिय मार्ग सल्लेरी–लामाजुरा–भकाञ्जे–रामेछाप–जिरी हुँदै काठमाण्डौसम्म यात्रु पुर्याउन पहल गरेको मेयर शेर्पाले बताए । पहिलो पटक नयाँ सडक सञ्जाल मार्फत सुमोले यात्रुलाई काठमाण्डौसम्म पुर्याउने भएपछि उनिहरुको बिदाईका लागि मेयर शेर्पा आफैं लामाजुरासम्म पुगेका थिए ।

यात्रुहरुलाई बिदाई गरी नगरपालिका फर्केपछि मेयर शेर्पाले आगामी दिनमा सो सडकको स्तरोन्नतीका लागि योजना बनाई सम्बन्धित निकाय, प्रदेश तथा संघिय सरकारसँगको समन्वयमा पूर्ण रुपमा सडक संचालन गर्न पहल गर्ने प्रतिवद्धता व्यक्त गरेका छन् ।

काठमाण्डौ–सोलुखुम्बु सडक सञ्जालमा नजोडिदा खाद्यान्नका सामान तथा पर्यटक हिड्नका लागि प्रयोगमा रहेको सो पदमार्गमा अहिले सरकारको लगानीमा सडक सञ्जाल निर्माण गरी आवतजावतमा सहज बनाइएको छ । सो मार्ग सोलुखुम्बुकै लिखुपिके गाउँपालिका हुँदै छिमेकी जिल्ला रामेछाप पुग्ने गर्दछ ।

हाल नगरपालिकाले आफ्नो अधिकार क्षेत्रभित्र रहेको भुगोलसम्म ट्रयाक ओपन तथा सोलिङ गरी सहज रुपमा यातायातका साधन आवतजावतमा सहजता ल्याएको छ ।

केही समयअघिबाट मात्र संचालनमा आएको सो कच्ची सडक मार्गबाट काठमाण्डौसम्मको यात्रा गर्न सुमोलाई करिब १५ घण्टामा लागेको सवारी चालक जनककुमार खड्काले बताए । चालक खड्काका अनुसार पहिलो यात्रा भएकाले यात्रु तथा चालकहरुमा केही त्रास देखिएपनि नयाँ रुट सुरक्षित छ ।

बाटोमा पहिरो तथा अन्य अवरोध छैन ।

काठमाण्डौसम्म सकुशल आई पुगेपछि यात्रुहरुले खुसी साटासाट गर्दै यातायात चालक व्यवसायीलाई धन्यवाद दिएका छन् ।

यसैबीच बस सेवा मार्फत वैकल्पिक सडकको रुपमा घुर्मी, कटारी, हेटौंडा हुदै काठमाडौँ प्रयोग गर्न थालिएको छ । हिमाल तराई यातायातले पनि आजैबाट सल्लेरीदेखि उदयपुरको कटारी, भिमान, हेटौँडा हुँदै काठमाण्डौँसम्म बस सेवा सञ्चालनमा ल्याएको छ ।

जिल्ला प्रशासन कार्यालय तथा जिल्ला प्रहरी कार्यालय सोलुखुम्बुको समन्वयमा बसले बैकल्पिक सडक मार्फत सेवा सञ्चालन गरेको हो । करिब १८ घण्टामा सोलुखुम्बुबाट काठ्माण्डौ पुग्ने भएकाले भाडा दर भने केही महंगो पर्न जाने बस सेवाका सोलुखुम्बु ईन्चार्ज लोकबहादुर श्रेष्ठले जानकारी दिए ।

भाडा दरका लागि भने जिल्ला प्रशासन कार्यालयले हालका लागि वैकल्पिक सडकका रुपमा कच्ची तथा लामो रुटको बाटो प्रयोग गर्नुपर्ने भएकाले ३ हजार ५ सय रुपैंया भाडा दर निर्धारण गरिएको छ ।