नेपाली कांग्रेस ले प्रतिनिधिसभाको समानुपातिकतर्फका २० सांसदको नाम टुंगो लगाएको छ। पार्टीको केन्द्रीय कार्यसम्पादन समितिको बैठकले १५ महिला र ५ पुरुषसहित २० जनाको नाम अन्तिम रूप दिएको हो।
पार्टीका प्रवक्ता देवराज चालिसे का अनुसार कांग्रेसले समानुपातिक प्रणालीबाट प्राप्त २० सिटका लागि विभिन्न क्लस्टरको प्रतिनिधित्व मिलाउँदै सूची तयार पारेको हो। यससँगै प्रतिनिधिसभा र राष्ट्रिय सभा गरी कांग्रेसका कुल सांसद संख्या ६२ पुग्ने भएको छ।
समानुपातिक प्रणालीको प्रावधानअनुसार कांग्रेसले २० सिटमध्ये १५ महिला उम्मेदवार अनिवार्य रूपमा समावेश गर्नुपर्ने भएकाले सोही आधारमा सूची तय गरिएको प्रवक्ता चालिसेले बताए।
पार्टीले आदिवासी जनजातिबाट ६ जना, खसआर्यबाट ६ जना तथा थारु, दलित, मधेसी, मुस्लिम र पिछडिएको समुदायबाट गरी ५ जना सांसद चयन गरेको छ। प्रस्तावित नामहरू निर्वाचन आयोगले क्लस्टर अनुसार रूजु गरेपछि आवश्यक परे केही हेरफेर हुन सक्ने कांग्रेसले जनाएको छ।
कांग्रेसका प्रस्तावित समानुपातिक सांसद
खसआर्य कोटा
१. सुशीला ढकाल
२. रुक्मिणीदेवी कोइराला
३. रीना उप्रेती
४. सीता थपलिया
५. गंगा शाही
६. अर्जुननरसिंह केसी
आदिवासी जनजाति कोटा
७. गीताकुमारी सेन्दाङ
८. गंगालक्ष्मी अवाल
९. गीता गुरुङ
१०. रेनुका काउचा
११. सुनिताकुमारी सुवेदी
१२. भीष्मराज आङ्देम्बे
मधेसी कोटा
१३. निनुकुमारी कर्ण
१४. रेखाकुमारी यादव
१५. चन्द्रमोहन यादव
दलित कोटा
१६. हरिनादेवी कामी
१७. पवित्रा विक
१८. मानबहादुर नेपाली
थारू कोटा
१९. प्रमिलाकुमारी गच्छदार
मुस्लिम कोटा
२०. शाहजान खातुन
कांग्रेसले सार्वजनिक गरेको सूचीलाई निर्वाचन आयोगले क्लस्टरअनुसार अन्तिम प्रमाणीकरण गरेपछि मात्रै औपचारिक रूपमा सांसदको पद सुनिश्चित हुने छ।
प्रतिक्रिया