ओखलढुंगाका नेकपाका उम्मेदवार अम्बिरबाबु गुरुङले पूर्वमन्त्री स्वर्गिय नेता बलबहादुर राईको गाउँ मोलीबाट चुनावी प्रचार अभियान थालेका छन् । नेकपा एमालेबाट विद्रोह गरेर नेपाली कम्युनिष्ट पार्टीबाट उम्मेदवार बनेका र जनता समाजवादी पार्टीको समेत समर्थन पाएका गुरुङले जिल्लाका सबै वडा र टोलबस्तिमा पुग्ने योजनासहित मोलीबाट चुनावी प्रचार र घरदैलो अभियान थालेका हुन् ।
चुनावी अभियान शुभारम्भ गर्न मोली पुगेका गुरुङलाई स्थानीयले पूर्वमन्त्री बलबहादुर राईसँग तुलना गर्दै विकास गर्ने आशामा समर्थन गर्ने वाचा गरेका छन् । घरघरमा पुगेका गुरुङलाई मतदाताले भव्य स्वागत गरेका थिए ।
सर्वसाधारण नागरिक मात्रै होइन विभिन्न राजनीतिक दलका नेता कार्यकर्ताले पनि गुरुङको उम्मेदवारीमा समर्थन जनाएका छन् । एमालेमा हुँदा गुरुङले अभिभावकत्व दिएका नेता कार्यकर्ता अहिले गुरुङकै पक्षमा खुलेर चुनावी अभियानमा जुटेका छन् ।
एमालेको कोशी प्रदेश कमिटी सदस्य उमेश कार्की, मानेभञ्ज्याङ एमालेका प्रभावशाली नेता, जिल्ला कमिटी सदस्य सुजन रुम्दालीसहितका नेताहरुले विगतमा गरेको काम र आगामी योजनाका आधारमा अम्बिर गुरुङको विकल्प नभएको भन्दै समर्थन जनाएका हुन् ।
‘ओखलढुंगामा विकास ल्याउने नेता कि बलबहादुर राई नै थिए, कि अम्बिरबाबु गुरुङ नै छन्’ मोलीमा आयोजित चुनावी सभामा जसपाका नेता दिपेन्द्र रुम्दालीले भने, ‘तपाई हाम्रो १ भोटले जन्मभूमीमा समृद्धि ल्याउने वाला छ । त्यसैले तारामा भोट हालेर अम्बिरबाबु गुरुङलाई विजयी गराऔं ।’ गुरुङले विगतमा गरेका काम र आगामी दिनका सम्भावना बुझेर विकास र समृद्धिको सर्तमा जसपाले कार्यगत एकता गरेर समर्थन जनाएको बताए ।
मानेभञ्ज्याङका गाउँ गाउँमा गुरुङले घरदैलो गरिरहेका छन् ।
कोशी प्रदेशका पूर्व मन्त्री समेत रहेका उम्मेदवार गुरुङले जिल्लाको विकासको खाका बोकेर जिल्लाबासी मतदाताको साझा उम्मेदवारका रुपमा आफु चुनावी मैदानमा आएको बताए । जिल्लाबासीले जिताएर पठाए ५ वर्षमा आफुले देखिनेगरी विकासका काम गर्ने र जनताको सेवा गर्ने वाचा गरेका छन् ।
प्रतिक्रिया