सर्लाही पुगेर गगनले भने- काठमाडौं ४ मा सजिलै चुनाव जित्थेँ, आँट गरेर मधेश झरेको हुँ

नेपाली कांग्रेसका सभापति गगन थापाले काठमाडौं ४ मा आफूले सहजै जित निकाल्ने अवस्था भएपनि मधेश झरेको बताएका छन्। सर्लाही ४ मा युवाहरूसँगको छलफलमा काठमाडौं ४ मा आफ्नो प्रतिस्पर्धी नै नभएको जिकिर गरे।

उनले भने, ‘मैले यसअघि तीन पटक चुनाव जितिसकेको थिएँ, मलाई सजिलो अवस्था थियो। मेरो उम्मेदवारी काठमाडौं कि सर्लाही भन्ने कुराको टुङ्गो नलागेसम्म अरू प्रतिस्पर्धी पार्टीहरूले उम्मेदवार बन्ने मान्छे नै पाएन। म काठमाडौं नलड्ने भनेपछि मात्रै नयाँ होस् वा पुरानो पार्टीको तर्फबाट उम्मेदवारी दर्ता भयो।’

उनले आफू सर्लाही ४ मा झरेपछि काठमाडौंका मतदाता स्तब्ध बनेको जिकिर गरे।

उनले थपे, ‘मैले काठमाडौंका मतदातालाई चित्तबुझ्दो जवाफ दिन सकेको छैन। तर म आफैँले चाहिँ जानेर बुझेर नै सर्लाही ४ रोजेको हुँ। मैले अघिल्लो पटक नै मधेश झर्न चाहेको थिए। अहिले आँट गरेको आएको हुँ।’

कांग्रेसको सभापति भएपछि मधेशलाई नजोडी नहुने भएकाले आफ्नो जोड मधेशमा रहेको बताए। आफू मधेश नझरी कांग्रेस ठुलो पार्टी बन्न नसक्ने उनको बुझाइ छ।