कोशी प्रदेश सरकारमा आज हुने मन्त्रिपरिषद् पुनर्गठनलाई सामान्य हेरफेरभन्दा गठबन्धन व्यवस्थापन र शक्ति सन्तुलन मिलाउने ‘फुल रिसेट’ का रूपमा हेरिएको छ ।
मुख्यमन्त्री हिक्मत कार्कीले कांग्रेस–एमाले गठबन्धनभित्र देखिएका असन्तुलन र असन्तुष्टिलाई व्यवस्थापन गर्ने उद्देश्यसहित सबै बहालवाला मन्त्रीहरूलाई फिर्ता बोलाएर नयाँ अनुहारसहितको टिम ल्याउन लागेका हुन्।
मुख्यमन्त्री तथा मन्त्रिपरिषद् कार्यालय स्रोतका अनुसार, मुख्यमन्त्रीबाहेक सम्पूर्ण मन्त्री परिवर्तन गर्ने निर्णय कांग्रेस संसदीय दलका नेता उद्धव थापा र मुख्यमन्त्री कार्कीबीचको सहमतिपछि टुंगिएको हो। यसलाई आगामी राजनीतिक समीकरण र सरकारको कार्यसम्पादन सुधारतर्फको सन्देशका रूपमा समेत बुझिएको छ।
‘पुराना अनुहार बाहिर, नयाँ सन्तुलन भित्र’
पुनर्गठनमा एमाले र कांग्रेस दुवैले आफ्ना पुराना मन्त्रीहरू फिर्ता बोलाएर नयाँ प्रतिनिधित्व र आन्तरिक शक्ति सन्तुलन मिलाउने प्रयास गरेका छन् । यसले दुवै दलभित्र लामो समयदेखि उठ्दै आएको अनुहार फेरबदल र कार्यसम्पादनको प्रश्नलाई सम्बोधन गर्ने संकेत दिएको छ।
एमालेतर्फबाट नयाँ जिम्मेवारी
एमालेबाट सरकारमा जाने नयाँ अनुहारमध्ये
विदुर लिङथेप – आर्थिक मामिला तथा योजना
चिन्तन पाठक – खानेपानी, सिँचाइ तथा ऊर्जा
इन्द्रमणि पराजुली – आन्तरिक मामिला तथा कानुन
रामप्रसाद महतो – सामाजिक विकास
उमाकान्त गौतम – राज्यमन्त्री नियुक्त हुने भएका छन् । यसले एमालेभित्र क्षेत्रीय र पुस्तागत सन्तुलन मिलाउने प्रयास देखिन्छ।
कांग्रेसको ‘पुनःपोजिसनिङ’कांग्रेसले पनि मन्त्रालयहरूमा नयाँ अनुहार पठाउँदै आफ्नो उपस्थिति मजबुत बनाउने रणनीति लिएको छ।
प्रदीप सुनुवार – भौतिक पूर्वाधार
भीम पराजुली – पर्यटन, वन तथा वातावरण
मानबहादुर लिम्बू – स्वास्थ्य
इस्राइल मन्सुरी – उद्योग, कृषि तथा सहकारी
शोभा चेम्जोङ – राज्यमन्त्री
कांग्रेसका तर्फबाट यसलाई सरकारभित्र प्रभावकारी भूमिका खोज्ने प्रयास का रूपमा हेरिएको छ।
राजनीतिक सन्देश के हो?
विश्लेषकहरूका अनुसार, यो पुनर्गठनले गठबन्धनभित्रको असन्तोष थाम्ने, सरकारको गति र छवि सुधार्ने, आगामी राजनीतिक समीकरणका लागि आधार तयार गर्ने तीनवटै उद्देश्य बोकेको देखिन्छ ।
आज बेलुकासम्म नयाँ मन्त्रिमण्डलले शपथ लिने तयारी छ।
प्रतिक्रिया