चीनमा जन्मदर वृद्धि गर्न नयाँ योजना लागू

चीनले जन्मदर वृद्धिका लागि आजदेखि नयाँ योजना लागू गरेको छ । दशकौँसम्म एक सन्तान नीति लागू गरेको चीनले जनसङ्ख्या ऋणात्मक हुन थालेपछि केही वर्षदेखि जन्मदर बढाउने योजनाहरू लागू गरिरहेको छ । त्यही अन्तर्गत आजदेखि नयाँ योजना लागू भएको हो ।

नयाँ योजना अनुसार चिनियाँ नागरिकले आजदेखि कण्डम लगायत गर्भ निरोधकहरूमा १३ प्रतिशत कर तिर्नुपर्ने छ । यस्तै सरकारले बालबालिकाको हेरचाहमा छुट दिएको छ । युवा पपुलेशन रिसर्च इन्स्टिट्यूटको सन् २०२४ को प्रतिवेदन अनुसार बच्चा हुर्काउने सबैभन्दा महँगो देशमध्ये चीन एक हो । यस्तै अभिभावकको बिदा विस्तार र नयाँ जन्मिएका बच्चाका अभिभावकलाई नगद दिने कार्यक्रम समेत रहेको बीबीसीले जनाएको छ ।

चीनले आजदेखि विवाहसँग सम्बन्धित सेवाहरूमा पनि मूल्य अभिवृद्धि कर छुट गरेको छ । बुढ्यौली जनसङ्ख्याको समस्या सामना गर्न थालेपछि चीनले युवाहरूलाई विवाह गर्न र दम्पतीहरूलाई बच्चा जन्माउन प्रोत्साहित गर्ने प्रयास गरिरहेको छ ।

चीनमा युवा जोडीहरू कम सन्तान जन्माउने वा जन्माउँदै नजन्माउने गर्छन् । चीनको जनसङ्ख्या लगातार तीन वर्ष ऋणात्मक बनेको छ । सन् २०२४ मा चीनमा ९५ लाख ४० हजार बच्चा जन्मेका छन् । याे सङ्ख्या एक दशकअघिको भन्दा आधा हो ।