समानुपातिक उम्मेदवारबारे फैलाइएका भ्रमप्रति कुलमान घिसिङको आपत्ति

उर्जा जलस्रोत तथा सिंचाइ मन्त्री कुलमान घिसिङले प्रतिनिधिसभा निर्वाचन २०८२ का लागि समानुपातिक निर्वाचन प्रणालीअन्तर्गत सिफारिस गरिएका केही उम्मेदवारलाई लिएर विभिन्न सञ्चारमाध्यम तथा सामाजिक सञ्जालमा असत्य, भ्रामक र नियोजित टिकाटिप्पणी फैलाइएको भन्दै गम्भीर ध्यानाकर्षण भएको बताएका छन् ।
आज सामाजिक सञ्जालमार्फत उहाले सञ्जालमा ‘भाञ्जा’ भनेर उल्लेख गरिएका व्यक्ति आफ्ना भाञ्जा नभएको र उनी उज्यालो नेपाल पार्टीको तर्फबाट नभई अर्कै टिमबाट सिफारिस भएका व्यक्ति भएको बताएका हुन्। साथै, समानुपातिक सूचीमा रहेका र आफ्ना ‘ससुरा’ भनेर प्रचार गरिएका व्यक्ति पनि आफ्नो ससुरा नभएको उनले जनाएका छन्।
घिसिङले समानुपातिक उम्मेदवारको सूची कुनै व्यक्तिको चाहना वा दबाबमा नभई पार्टीको विधि, मापदण्ड र सामूहिक निर्णय प्रक्रियाबाट तयार गरिएको स्पष्ट गरे। सार्वजनिक जीवनमा प्रवेश गरेदेखि नै नातावाद, कृपावाद र स्वार्थको राजनीतिविरुद्ध निरन्तर उभिँदै आएको उल्लेख गर्दै, त्यही इमानदार यात्रालाई कमजोर पार्ने उद्देश्यले तथ्य नबुझी फैलाइएका हल्ला र आरोप दुःखद भएको बताए।
राजनीतिमा असहमति हुन सक्ने भए पनि झुट र भ्रम फैलाएर बदनाम गर्ने प्रयास आपत्तिजनक रहेको उनको भनाइ छ। साथै, बन्दसूचीमा देखिएका प्राविधिक त्रुटिहरू निर्वाचन आयोगले तोकेको समयावधिभित्र सच्याउने प्रतिबद्धता समेत व्यक्त गरेका छन्।