एउटै मन्डपमा आमा–छोरीको एकसाथ बिहे

आमा र छोरीले एकैदिन त्यो पनि एउटै मण्डपमा बिहे गरे भनेको सुन्दा अचम्म लाग्न सक्छ।

तर इङ्ग्ल्यान्डमा आमा र छोरीले आआफ्ना ‘पार्टनर’सँग एकैदिन संयुक्त रूपमा विवाह गरेका छन्।

३२ वर्षीया हन्ना शेफर्डलाई उनका सौतेलो बुवा ६५ वर्षीय फिलिप ग्रान्टले ३५ वर्षीय क्रिस्टोफर जोनसनसँग विवाह गराइदिन मण्डपमा ल्याए।

त्यसको केही मिनेटपछि हन्नाकी आमा ६४ वर्षीया हेलेन शेफर्ड पनि फिलिपको बेहुली बनेर आइन्।

उनलाई चाहिँ उनकी अर्की छोरी ३६ वर्षीय समान्था ब्राउनले मण्डपमा ल्याएकी थिइन्।

डेली स्टार न्युजका अनुसार यो विवाहको दृश्य २०२४ डिसेम्बर २१ को हो।

फाइनान्स असिस्टेन्ट हन्ना भन्छिन्, ‘वास्तवमा त्यो अहिलेसम्मकै विशेष दिन थियो। विवाहको भावना र आनन्द दुईगुना थियो, निकै प्रेमपूर्ण थियो।’

यस क्रममा उनले यसरी आमा–छोरीको एकैसाथ बिहे गर्ने सम्भवतः संसारमै पहिलो आफूहरू भएको पनि बताइन्।

दुलही बन्नुअघि नै हन्नाका दुई छोरी र एक छोरा भइसकेका थिए। बिहेमा उनका छोराछोरीसँगै उनकी दिदी समान्थाका एक छोरी पनि सहभागी भएका थिए।

कतिपय देशमा औपचारिक बिहे गर्नुअघि नै महिला–पुरुष सँगै बस्ने तथा छोराछोरी जन्माउने गर्छन्।