थाइल्यान्डमा एक महिलालाई अन्त्येष्टिका लागि बौद्ध मन्दिरमा ल्याइएको बेला कफिनभित्र हल्लिएपछि मन्दिरका कर्मचारीहरू आश्चर्यचकित भएका छन् ।
यो घटना बैंककको बाहिरी भागमा रहेको नोन्थबुरी प्रान्तको वाट रात प्राखोङ थाम मन्दिरमा भएको हो । घटनाबारेमा एउटा भिडियो फेसबुक पेजमा सेयर गरिएको छ । भिडियोमा एक पिकअप ट्रकमा राखिएको कफिनभित्रकी महिलाले अचानक आफ्नो हात र टाउको हल्लाएको देखिन्छ । महिलालाई हल्लिएको देखेर मन्दिरका कर्मचारीहरू आतंकित भएका थिए ।
मन्दिरका सामान्य र वित्तीय मामिला प्रबन्धक पाइराट सुधथुपले समाचार एजेन्सी एपीलाई बताएअनुसार, ६५ वर्षीया ती महिलालाई अन्त्येष्टिका लागि त्यहाँ ल्याइएको थियो ।
कफिनभित्रबाट हल्का धुकधुकी सुनेपछि सबैलाई कफिन खोल्न भनेको भन्दै सुधथुपले भने, “म चकित भएँ र उनीहरूलाई कफिन खोल्न भनेँ । त्यसपछि सबैजना स्तब्ध भए । मैले उनको आँखा हल्का खुलेको देखेँ र उनी कफिनको छेउमा ढक्ढकाइरहेकी थिइन् ।”
पीडित महिलाका दाइका अनुसार, उनी दुई वर्षदेखि गम्भीर बिरामी थिइन् । उनी ओछ्यानमा सीमित थिइन् । दुई दिनदेखि उनमा कुनै हलचल देखिएको थिएन ।
त्यसपछि दाइले बहिनीको इच्छा अनुसार अंगदान गर्नका लागि उनलाई अस्पताल लगेका थिए । तर, अस्पतालले मृत्यु प्रमाणपत्र नभएको कारण देखाउँदै उनीहरूलाई फर्काइदिएको थियो ।
त्यसपछि उनीहरू निःशुल्क अन्त्येष्टि हुने भएकाले मन्दिर आएका थिए । यद्यपि, यहाँ पनि प्रमाणपत्र नभएको कारणले अन्त्येष्टि गर्न मानेनन् । व्यवस्थापकले महिलाका दाइलाई प्रमाणपत्र कसरी प्राप्त गर्न सकिन्छ भनेर बुझाइरहेका बेला कफिनबाट ढक्ढकाएको आवाज सुनिएको थियो ।
अहिले ती महिलालाई अस्पताल पठाइएको र मन्दिर प्रशासनले उनको उपचार खर्च व्यहोर्ने बताएको छ ।
प्रतिक्रिया