सिन्धुलीको मरीण गाउँपालिकामा प्रशोधित भैंसीको मासु उत्पादन गरी चीन निर्यात गर्ने लक्ष्यसहित ठूलो लगानीको मासु प्रशोधन उद्योग निर्माणको कार्य मंसिरको अन्तिम सातादेखि सुरु हुने भएको छ । हिमालयन फुड इन्टरनेसनल प्रा.लि.ले डिजाइन तथा प्रारम्भिक तयारी पूरा गरी उद्योग निर्माणको चरणमा प्रवेश गरेको जनाएको छ ।
उद्योगका लागि कुल २७ अर्ब ६४ करोड ८४ लाख ६० हजार रुपैयाँ लगानी अनुमान गरिएको छ । यसमध्ये करिब २० अर्ब रुपैयाँ कारखाना तथा प्रशोधन प्लान्ट निर्माणमा खर्च हुने छ भने बाँकी सात अर्ब रुपैयाँ पशुपालन, कामदार आवास, होल्डिङ सेन्टर र घाँस उत्पादनमा लगानी गरिने कम्पनीले जनाएको छ ।
उद्योग निर्माणका लागि चीनको छेङ्दु जियान फुड लिमिटेडबाट प्रत्यक्ष वैदेशिक लगानी (एफडिआई) भित्र्याइँदै छ । उद्योग विभागले गत साउनमा नै यस परियोजनाका लागि विदेशी लगानी स्वीकृत प्रदान गरिसकेको छ । हालसम्म करिब ५० करोड रुपैयाँ विदेशी लगानी भित्रिसकेको र बाँकी लगानी प्रक्रियामै रहेको कम्पनीले जानकारी दिएको छ ।
हिमालयन फुड इन्टरनेसनलका अध्यक्ष डा. नवीन शर्माका अनुसार जग्गा लेआउट तथा डिजाइनको काम सम्पन्न भइसकेको छ । “मंसिरको अन्तिम साताबाट फ्याक्ट्रीको संरचनागत निर्माण सुरु गर्ने तयारीमा छौं,” उनले भने । उनका अनुसार चीनबाट थप २० अर्ब रुपैयाँ भित्र्याउने प्रक्रिया अन्तिम चरणमा छ भने बाँकी रकम चिनियाँ तथा नेपाली साझेदार कम्पनीमार्फत जुटाइँदै छ ।
उद्योग ५५ बिघा क्षेत्रफलमा फैलिनेछ । सञ्चालनमा आएपछि करिब ५ हजार १५६ जनालाई प्रत्यक्ष रोजगारी उपलब्ध गराउने तथ्यांक कम्पनीले उद्योग विभागमा पेश गरिसकेको छ । पूर्ण क्षमतामा सञ्चालन भएपछि दैनिक करिब पाँच हजार राँगा तथा भैंसी प्रशोधन गरी पाँच सय मेट्रिक टन मासु निर्यात गर्ने लक्ष्य लिइएको छ ।
वार्षिक रूपमा दुई लाख मेट्रिक टन प्रशोधित बफेलो मिट तथा करिब ५५ हजार मेट्रिक टन सह–उत्पादन (हाड, छाला, टाउको, आन्तरिक अङ्गलगायत) उत्पादन गर्ने योजनासहित उद्योग अघि बढाइएको छ । उत्पादन गरिएको मासु सिन्धुलीबाट काठमाडौँ हुँदै केरुङ नाकामार्फत चीन निर्यात गरिनेछ ।
कच्चा पदार्थको सुनिश्चितताका लागि देशका विभिन्न स्थानमा व्यावसायिक तथा रोगमुक्त भैंसीपालन प्रवद्र्धन अभियान सुरु गरिएको छ । किसानलाई समेटेर भैंसीपालक समूह गठन गरिएको छ भने बर्दियाको गुलरियामा घाँस उत्पादन प्रक्रिया सञ्चालनमा आइसकेको कम्पनीले जनाएको छ ।
उद्योग निर्माण कार्य दुई सिफ्टमा सञ्चालन गरी आठ महिनाभित्र सम्पन्न गर्ने लक्ष्य लिइएको छ । यसअघि असोजमा ढुङ्गा, गिट्टी र बालुवा उत्खननमा आएको रोकका कारण निर्माणमा ढिलाइ भए पनि अब समयमै काम अघि बढाउने तयारी रहेको कम्पनीले जनाएको छ । कम्पनीले निर्माण सम्पन्न भएको एक वर्षभित्र चीनमा मासु निर्यात सुरु गर्ने लक्ष्य लिएको छ ।
यो उद्योग सञ्चालनमा आएपछि स्थानीय स्तरमा रोजगारी, पशुपालन प्रवद्र्धन र निर्यातमार्फत मुलुकको व्यापार घाटा कम गर्न महत्वपूर्ण योगदान पुग्ने अपेक्षा गरिएको छ ।
प्रतिक्रिया