काठमाण्डौको वायू प्रदुषण अझै खतरनाक, आजबाट केही कम हुने अनुमान

वायू प्रदुषणमा विश्वकै पहिलो अनि दोस्रो स्थानमा रहेको काठमाण्डौको वातावरणमा आजबाट केही सुधार हुने अनुमान गरिएको छ ।

केही दिन काठमाडौं लगातार संसारकै प्रदूषित शहर बन्दै गर्दा हिजो बुधबार प्रदूषित हावाले खतरनाकको तह पार गरेको थियो । दिनभरी नै प्रदुषणका कारण काठमाण्डौका नागरिकले स्वास्थ्यमा समस्या समेत देखा परेको बताए । आँखा पोल्ने, नाक बन्द हुने, चिलाउने लगायतका समस्या देखिएको उनिहरुले बताए ।

आज बिहान पनि खतरनाकको तह सुचांक भन्दा माथि नै छ । आईक्यूएयरको तथ्यांक अनुसार आज बिहान काठमाडौंको औसत एयर क्वालिटी इन्डेक्स (एक्युआई) रौं भन्दा तीन गुणा मसिना धुलो धुवाँका कण प्रतिघण्टा ३७० माइक्रोग्राम प्रतिघनमिटर मापन गरिएको छ ।

१५१ देखि २०० सम्मलाई अस्वस्थ, २०१ देखि ३०० सम्मलाई निकै अस्वस्थ र ३०१ भन्दा माथि मापन भए खतरनाक तह पुगेको मानिन्छ ।

आजदेखि भने खतराको तहबाट एक्युआई विस्तारै घट्दै जाने आईक्यूएयरले पूर्वानुमान गरेको छ । अत्यधिक प्रदूषित रहेको भारतको नयाँ दिल्ली र मुम्बइ जस्ता सहरमा प्रदूषण घट्न थालेकोले काठमाडौंमा पनि घट्ने अनुमान गरिएको छ ।

बिहान अत्यधिक प्रदूषित भएको हावा दिउँसो २ बजेदेखि कम हुने आईक्यूएयरको पूर्वानुमान छ ।

यता वातावरण विभागले भने काठमाडौंमा प्रदूषित हावा बढेकोले घरबाहिर ननिस्किने भनेको छ । निस्किन परेमा मास्क लगाएर सुरक्षित भएर मात्रै निस्किन अनुरोध गरेको छ । साथै, प्रदूषण बढाउने कार्य नगर्न भनेको छ ।