भाटभटेनीद्वारा सुरक्षा गार्ड तथा अन्य कर्मचारी सम्मानित

पराजुलीलाई ५ लाख नगद सहित ५ ग्रेड बढुवा

साझा प्रेस
1.5k
Shares

भाटभटेनी सुपरमार्केटले बहादुरी प्रस्तुत गर्ने सुरक्षा गार्ड दुलप्रसाद पराजुलीलाई ५ लाख रुपैैंया नगद सहित पाँच ग्रेड बढुवा गरेको छ ।

गत चैत्र १५ गते भएको आन्दोलनका क्रममा भाटभटेनीमा भएको लुटपाटका क्रममा बहादुरीका साथ लुटपाटका लागि आएकाहरुलाई भगाएका पराजुलीलाई आज एक कार्यक्रममा बिच भाटभटेनीका मालिक मीनबहादुर गुरुङले उनलाई दुबोको माला लगाइदिएर सम्मान गर्दै नगद पुरस्कार प्रदान गरेका हुन् ।

सोही दिन भएको लुटपाट र तोडफोडमा भाटभटेनीलाई जोगाउन भूमिका खेल्ने अन्य कर्मचारीहरुलाई पनि पुरस्कार र सम्मान प्रदान गरिएको छ । अन्य तीन सुरक्षा गार्ड सूर्य गिरी, दीपेश खड्का, सोमबहादुर भुजेललाई जनही २५ हजार १ रुपैयाँ र एक ग्रेड बढुवा गरिएको छ ।

यस्तै ग्रोसरी सिनियर सुपरभाइजर सागर गुरुङलाई ५१ हजार एक सय ११ को चेक र दुई ग्रेड बढुवा प्राप्त गरेका छन् ।

२२ बर्षदेखि भाटभटेनीमा काम गर्दै आएका पराजुलीले त्यस दिन लुटपाट गर्नेहरूको एक्लै प्रतिकार गरेका थिए । उनले लुटेराहरूलाई पिटेर लखेटेको भिडिओ सामाजिक सञ्जालमा भाइरल भएको थियो ।