आइल्याम पिक र लबुचे पिकमा डोरी टाँग्ने कार्य सम्पन्न

गार्डेन राई, सोलुखुम्बु ।  आमाडब्लम युवा क्लबले आइल्याम पिक र लबुचे पिकको आरोहणका लागि डोरी टाँग्ने कार्य सम्पना भएको जनाएको छ ।

स्प्रिङ सिजनमा आरोहणका लागि आइल्यान्ड पिक र लबुचे पिकको क्राम्पोन पोइन्ट देखि चुचुरोसम्मका लागि डोरी टाँगि सकिएको छ । ६,१०० मिटर उचाइको आइल्याम पिक र ६,१४५ मिटर उचाइको लबुचे पिकमा फागुन २४ गते ८/८ सय मिटर डोरी टाँगिएको आमाडब्लम युवा क्लबका अध्यक्ष सोनामदोर्जि शेर्पाले जानकारी दिए ।  

आमाडब्लम युवा क्लबका अध्यक्ष सोनाम दोर्जि शेर्पाको नेतृत्वमा खटिएको ८ जनाको टोलीले दुई दिनमा दुई वटा पिकमा डोरी टाँग्ने कार्य सम्पन्न गरेको हो । लबुचे पिकको लागि नाम्गेल दोर्जी तामाङको नेतृत्वमा दोर्जि छोतेन शेर्पा, कर्मा ग्याल्जेन शेर्पा र पेमा पेम्बा शेर्पा खटिएक थिए। यता आइल्याम पिकका लागि आमाडब्लम युवा क्लबका सल्लाहकार कुंगा गेम्जु शेर्पाको नेतृत्वमा लाक्पा ओङछु शेर्पा, लाक्पा छिरी शेर्पा र छिरिङ टासी शेर्पाको टोलिले डोरी टागेको हो । 

दुबै पिक आरोहण सहजताको लागि हरेक सिजनमा डोरी टाँग्ने कार्य गरिन्छ । डोरी टाँगेसँगै आरोहणका लागि बाटो खुलेको अध्यक्ष शेर्पाले बताए । 

यसैबिच नेपाल पर्वतारोहण सङ्घ र पाङबोचे आमाडब्लम युवा क्लबबिच आइल्यान्ड पिक र लबुचे पिकको आरोहण व्यवस्थापन सम्बन्धी गत माघ २७ गते सम्झौता भएको थियो ।  २०२५ मार्च १ देखि लागू हुने गरी सम्झौता भएको पाङबोचे आमाडब्लम युवा क्लबका अध्यक्ष शेर्पाले जानकारी दिए ।   

सम्झौता पत्रमा आमाडब्लम युवा क्लबले आइल्यान्ड पिक र लबुछे पिक आरोहण सहजताका लागि डोरी र गाइडको व्यवस्थापन तथा नेपाल पर्वतारोहण सङ्घबाट जारी हुने आरोहण अनुमति पत्र परीक्षण गर्ने उल्लेख छ । 

यस्तै आरोहण कार्यमा संलग्न हुने नेपाली गाइडहरूको सूचि समेत क्लबले लेखाजोखा राख्ने, आरोहण अनुमति जारी हुने समयमा नेपाली गाइडहरूको औषधि उपचार, हेली उद्धार र दुर्घटना बिमा ट्रेकिङ कम्पनी मार्फत हुनुपर्ने उल्लेख छ ।

 पर्वतारोही गाइडहरूको आरोहण अवधि बिमा पत्र तथा विदेशी आरोहीहरूको आरोहण अनुमति पत्र नभएको खण्डमा आरोहण कार्य रद्द गरिने आमाडब्लम युवा क्लबले जनाएको छ ।