नेपालकै उत्कृष्ट पर्यटकीय गन्तव्य सगरमाथा क्षेत्रमा रहेको लुक्ला विमानस्थलमा पर्यटकीय मौसममा फाप्लु विमानस्थलबाट नियमित हवाइ उडान गर्नको लागि नेपाल आयल निगमको रिफ्यूलिङ्ग सेन्टर स्थापना गर्ने कार्य प्रक्रिया अगाडि बढेको छ ।
निगमको प्राविधिक टोलिले आज बिहिवार फाप्लु बिमानस्थलको स्थलगत निरीक्षण गरेको छ । निरीक्षणका क्रममा नेपाल सरकारका रक्षा मन्त्री मनबीर राईका प्रमुख स्वकीय सचिव बच्चु नारायण श्रेष्ठ, सोलुदुधकुन्ड नगरपालिकाका मेयर नाम्गेल जाङ्बु शेर्पा, नेकपा एमाले सोलुखुम्बुका अध्यक्ष डुफकुमार बास्तोला लगायतले फाप्लुमा रिफ्युलिङ्ग सेन्टर संचालनका लागि सबै क्षेत्रबाट पहल गरिने बताए ।
संसारकै उत्कृष्ट पर्यटकीय गन्तव्यको रुपमा पहिचान स्थापित गरेको सगरमाथा क्षेत्रको पर्यटकको चापलाई मध्यनजर गरी नेपाल सरकारको रक्षा मन्त्री मानबीर राईको विशेष अनुरोध र नेपाल सरकारको उद्योग, वाणिज्य तथा आपूर्ति मन्त्री माननीय दामोदर भण्डारीको समन्वयमा नेपाल आयल निगमले फाप्लु विमानस्थलमा रिफ्यूलिङ्ग सेन्टर स्थापनाको लागि प्रविधिक टोली फाप्लु विमानस्थलको निरिक्षणको लागि खटाएको हो ।
पर्यटनसँग सम्बन्धित विभिन्न संघसंस्था र आन्तरिक विमान सञ्चालक कम्पनीहरु लगायत वायुसेवा सञ्चालक संघ समेतको माग रहेको उक्त रिफ्यूलिङ्ग सेन्टर स्थापना आगामि पर्यटकीय मौसम बसन्त ऋतुबाट नै गर्नको लागि सबै क्षेत्रले समन्वय गरिरहेको जानकारी नेपाल आयल निगमका प्रतिनिधि जगदीश यादबले जानकारी दिए ।
फाप्लु विमानस्थलमा रिफ्यूलिङ्ग सेन्टर स्थापना भए पश्चात हालसम्म रामेछापको मन्थली विमानस्थलबाट पर्यटनको मौसममा हुने आन्तरिक हवाइ उडानमा मौसमको कारणले भइरहेको समस्या समाधान हुने मात्र हैन दुरी र खराव मौसमको कारणले गर्दा हवाइ उडानमा हुने अवरोधले गर्दा लुक्ला विमानस्थलमा अड्किने ठूलो संख्याको पर्यटकलाई छोटो दुरी र समयमा फाप्लु विमानस्थलमा अवतरण गराउन सकिने छ ।
प्रतिक्रिया