महाकुलुङमा किशोरी लक्षित कार्यक्रम सम्पन्न

झलक राई, सोलुखुम्बु । महाकुलुङ गाउँपालिका, सोलुखुम्बुका किशोरीहरुको क्षमता अभिवृद्धिका लागि १ दिने बिद्यालय स्तरिय किशोरी भेटघाट कार्यक्रम सम्पन्न भएको छ । गाउँपालिका अन्र्तगतका बिभिन्न बिद्यालयमा छुट्टाछुट्टै आयोजित कार्यक्रममा १ सय ७५ जनाभन्दा बढी किशोरीहरुको सहभागितामा रहेको थियो ।

महाकुलुङ गाउँपालिका तथा ईको हिमाल नेपालको सहकार्यमा संचालित लैङ्गिक मैत्री हिमालयन बिद्यालय परियोजना अन्र्तगत स्थानिय बिद्यालयहरुका किशोरीहरुलाई लक्षित गरी छेस्काम मावि, गुदेल मावि, सगरमाथा मावि तथा जनसुधार आविमा कार्यक्रम संचालन भएको गाउँपालिकाले जनाएको छ ।

किशोरीहरुको क्षमता अभिवृद्धि गर्दै शैक्षिक, आर्थिक, सामाजिक, राजनैतिक लगायतका क्षेत्रमा पुरुष सरह उपस्थिती गराउने उद्धेश्य सहित संचालित कार्यक्रममा सहभागिहरुले आफ्नो बिभिन्न रचनाहरु समेत प्रस्तुत गरेका थिए ।

सो परियोजनाले आगामी दिनमा अझ बढी प्रभावकारी ढंगबाट सहभागिमुलक अभ्यास सहितका कार्यक्रम संचालन गर्नेमा बिद्यालयहरु आशावादी छन् ।