प्रकृति लम्सालका आमाबुबासँग प्रधानमन्त्री ओलीले गरे टेलिफोन बार्ता

भारतको उडिसा स्थित केआइआइटी कलेजको छात्रबासमा ज्यान गुमाएकी नेपाली विद्यार्थी प्रकृति लम्सालका परिवारसँग प्रधानमन्त्री केपि शर्मा ओलीले टेलिफोनमा कुराकानी गरेका छन् ।

नेकपा एमाले पोलिटब्युरो सदस्य महेश बस्नेतले भैरहवा स्थिति घरमा प्रकृतिका आमा–बाबु तथा परिवारका सदस्यसँग भेटघाटमा पुगेका बेला प्रधानमन्त्री ओलीसँग कुराकानी गराएका हुन् । भेटमा बस्नेतले प्रकृतिकी आमा सरिता शर्मा लम्साल र बुबा सुनिल लम्सालसँग कुराकानी गर्दै घटना प्रति दुःख ब्यक्त गरेका छन् ।

बस्नेतको फोनबाट कुरा गर्दै प्रधानमन्त्री ओलीले घटना प्रति दुःख व्यक्त गरे । प्रधानमन्त्रीले सो घटनाको निष्पक्ष छानबिनको लागि सरकारको तर्फबाट पनि अनुरोध गरिएको र कारबाहीको आवश्यक प्रक्रिया अघि बढिरहेको जानकारी गराएका छन् ।

टेलिफोन वार्तामा प्रकृतिका बुबा सुनिलले आफूहरू सम्हालिन प्रयत्न गरिरहेको प्रधानमन्त्रीलाई जानकारी गराए । ‘पोष्टमार्टम रिपोर्ट पनि आयो, फरेन्सिक रिपोर्ट के भयो अपडेट भइसकेको छैन, विभिन्न चारवटा विषयमा मुद्दा दर्ता हुने भन्ने आएको छ’, सुनिलले प्रधानमन्त्रीलाई भने ।

लम्सालले आफ्नो छोरीको ज्यान गइसकेको बताउँदै सो विश्व विद्यालयमा धेरै नेपालीका छोरा–छोरी पढिरहेकाले उनीहरूले त्यो पीडा भोग्नु नपरोस् भन्ने तर्फ प्रधानमन्त्रीको ध्यानाकर्षण गराए ।

प्रधानमन्त्री ओलीले सरकारले त्यस विषयमा चासो लिएको र त्यस विषयमा सजग रहेको भन्दै ढाडस दिए ।