स्वाभिमानको पक्षमा प्रेस चौतारी नेपाल स्पष्ट छ: अध्यक्ष बस्नेत

प्रेस चौतारी नेपालका अध्यक्ष गणेश बस्नेतले नीति र नेतृत्व माथि आक्रमण हुँदा प्रेस चौतारी आबद्ध पत्रकार चुप लागेर बस्न नसक्ने बताएका छन् ।

प्रेस चौतारी नेपाल एशोसिएट प्रदेशको दोस्रो अधिवेशनको बुधबार काठमाडौंमा उद्घाटन गर्दै अध्यक्ष बस्नेतले देशको स्वाभिमानको झण्डा उठाउने नेता माथि चौतर्फी आक्रमण हुँदा प्रेस चौतारी नेपालका सदस्यले निदाएको नाटक गर्न नहुने बताए । ‘हामी इमान भएका मानिसलाई इमानदार बनाउने अभियानमा लगेका हौँ’, बस्नेतले भने । 

प्रेस चौतारी नेपाल यसका सदस्यहरू इमानमा बाँचेका पत्रकार भएका बताउँदै बस्नेतले कसैले यो संगठनको इमान माथि प्रश्न उठाउँछ भने संगठनले त्यसको प्रतिवाद गर्ने बताए । प्रेस चौतारी नेपाल कहिल्यै पनि इमानबाट नडगमगाई गौरवशाली इतिहास बोकेर आएको संगठन भएको उन्ले स्पष्ट पारे । विचार बिनाको पत्रकारिता व्यावसायिक हुन नसक्ने बस्नेतको भनाइ थियो ।

व्यावसायिक पत्रकारिता भनेको विज्ञापन लिने र खाने पत्रकारिता मात्र नभएको बताउदै अध्यक्ष बस्नेतले व्यावसायिक पत्रकारिता भनेको देशको विकास र समृद्धिको लागि काम गर्ने पत्रकारिता भएको जिकिर गरे ।

प्रेस चौतारी नेपाल जनताको बहुदलीय जनवादको जगमा उभिएर पत्रकारिता गर्ने पत्रकारहरूको संगठन भएको उनको भनाई थियो । 

अधिवेशनबाट श्रीहरि थापाको अध्यक्षतामा सर्वसम्मत नेतृत्व चयन भएको छ । अधिवेशनलाई नेकपा एमालेका उपमहासचिव एवं नेपाल सरकारका सञ्चार तथा सूचना प्रविधि मन्त्री पृथ्वीसुब्बा गुरुङ, नेकपा एमाले स्थायी कमिटी सदस्य एवं प्रेस चौतारी नेपालका इञ्चार्ज राजेन्द्र गौतम लगायतले सम्बोधन गरेका थिए।