अफगानिस्तानका अलराउन्डर मोहम्मद नाबीले आफ्ना छोरा हसन इसाखिलसँग अन्तर्राष्ट्रिय क्रिकेट खेलेर मात्र संन्यास लिने संकेत गरेका छन् ।
आइसिसीसँग कुरा गर्दै नाबिले तत्काल क्रिकेटबाट संन्यास नलिने र आफ्ना छोरा हसन इसाखिलसँग अन्तर्राष्ट्रिय क्रिकेट खेल्ने संकेत दिएका हुन् । आगामी च्याम्पियन्स ट्रफीपछि एकदिवसीय क्रिकेटबाट सन्यास नलिने भएका छन् ।
४० वर्षीय नाबीले गत वर्ष नोेम्बरमा च्याम्पियन्स ट्रफीको अन्त्यमा ओडिआई क्रिकेटबाट सन्यास लिने बताएका थिए । नाबीले आइसिसीसँग भने, ‘यो मेरो अन्तिम ओडिआई प्रतियोगिता नहुन सक्छ । म सम्भवतः कम ओडिआई खेल्नेछु । युवा खेलाडीलाई अनुभव निर्माण गर्ने मौका दिनेछु ।’
नाबीका १८ वर्षीय छोरा इसाखिल सन् २०२४ मा भएको यू–१९ विश्वकपमा अफगानिस्तानको प्रतिनिधित्व गरेका थिए ।
च्याम्पियन्स ट्रफीको समूह ‘बी’ मा अफगानिस्तानसँगै इङ्ग्ल्याण्ड, अस्ट्रेलिया र दक्षिण अफ्रिका रहेका छन् । सन् २०२३ को ओडिआई विश्वकपमा शीर्ष आठ टोलीमा पर्न सफल भएपछि अफगानिस्तानले पहिलो पटक यस प्रतियोगितामा खेल्न लागेको हो । अफगानिस्तान सन् २०२४ को टी–२० विश्वकपमा पनि सेमिफाइनलमा पुगेको थियो ।
‘च्याम्पियन्स ट्रफीको तयारी राम्रो भएको छ,’ नाबीले भने ‘म बंगलादेश प्रिमियर लिगमा व्यस्त थिएँ, त्यहाँ च्याम्पियन भयाै । मैले अबु धाबीमा राष्ट्रिय टोलीसँग तीन सत्र गरे । त्यसैले म राम्रो लयमा छु।’
‘बीपीएल जित्दा फाइनलमा कठिन स्थितिबाट मलाई थप आत्मविश्वास मिलेको थियो । सम्पूर्ण प्रतियोगितामा हामीले वास्तवमै राम्रो प्रदर्शन गर्यौं र मेरो प्रदर्शन पनि राम्रो थियो, बलिङ र ब्याटिङ पनि, मैले चार वा पाँच म्याचमा काम समाप्त गर्न मद्दत गरें ।’
अफगानिस्तानले प्रतियोगिताका लागि १५ सदस्यीय टोलीमा एक परिवर्तन गर्दै घाइते अल्लाह गजान्फरको स्थानमा बायाँ हाते स्पिनर नांगेयालिया खारोटेलाई टोलीमा समावेश गरेको थियो ।
‘गजान्फर एक युवा खेलाडी हुन् । जसले विगत दुई वर्षदेखि निकै राम्रो प्रदर्शन गरिरहेका छन्,’ नाबीले भने ‘उनी निकै राम्रा स्पिनरका साथै राम्रो फिल्डर पनि हुन् ।’ उनले शारजाहमा दक्षिण अफ्रिका र आयरल्याण्डविरुद्ध निकै राम्रो बलिङ गरेका थिए ।
अफगानिस्तानले फेब्रुअरी २१ मा कराँचीमा दक्षिण अफ्रिकासँग खेल्दै च्याम्पियन्स ट्रफीको आफ्नो यात्रा सुरु गर्नेछ । फेब्रुअरी २६ र २८ मा इङ्ल्यान्ड र अस्ट्रेलियासँग खेल्न लाहोर जानेछ ।
प्रतिक्रिया